ನಿಮ್ಮ ಗಳಿಕೆಯನ್ನು ಹೆಚ್ಚಿಸಿಕೊಳ್ಳಲು 12 ಅತ್ಯುತ್ತಮ ಸಲಹೆಗಳು || ಪ್ರತಿಲಿಪಿಯಿಂದ ನಿಮಗೊಂದು ಆತ್ಮೀಯ ಪತ್ರ

ಆತ್ಮೀಯ ಲೇಖಕರೇ,

ಕಳೆದ ಮಾರ್ಚ್ ತಿಂಗಳಿನಲ್ಲಿ ಪ್ರತಿಲಿಪಿಯಿಂದ  ನಿಮಗೆ ಮೊದಲ ಪತ್ರವನ್ನು ಕಳುಹಿಸಲಾಗಿತ್ತು. (ಪ್ರತಿಲಿಪಿಯ ಆತ್ಮೀಯ ಪತ್ರ). ನೀವೂ ಸೇರಿದಂತೆ ಸಾವಿರಾರು ಲೇಖಕರು ಅದಕ್ಕೆ ತೋರಿಸಿದ ಪ್ರೀತಿ ಮತ್ತು ಆದರಗಳನ್ನು ಕಂಡು, ನಾವು ನಿಮಗೆ ಮತ್ತೊಮ್ಮೆ ಪತ್ರ ಬರೆಯಲು ಇಚ್ಛಿಸಿದ್ದೇವೆ. 

ಈ ಪತ್ರದಲ್ಲಿ 3 ಭಾಗಗಳಿವೆ: 

1. ಪ್ರತಿಲಿಪಿಯ ಯಾನದ ಕೆಲವು ನೆನಪುಗಳು 

2. ನಿಮಗೊಂದು ಅಚ್ಚರಿ! 

3. ಪ್ರತಿಲಿಪಿಯಲ್ಲಿ ನೀವು ಯಶಸ್ವಿ ಲೇಖಕರಾಗಲು ನಮ್ಮ ತಂಡದ ಕಡೆಯಿಂದ 12 ಪ್ರಮುಖ ಸಲಹೆಗಳು

ಮೊದಲಿಗೆ ಪ್ರತಿಲಿಪಿಯ ಬಗ್ಗೆ ಕೆಲವು ಆಸಕ್ತಿಕರ ಮಾಹಿತಿಗಳು:

2014 ರಲ್ಲಿ ಪ್ರತಿಲಿಪಿಯು ಒಂದು ಬಾಡಿಗೆ ಮನೆಯಲ್ಲಿ ಆರಂಭವಾಯಿತು. ನಮಗೆ ಅದೇ ಮನೆ ಮತ್ತು ಕಚೇರಿಯೂ ಆಗಿತ್ತು! ಅಂದು ನಾವು ಕೇವಲ 5 ಉದ್ಯೋಗಿಗಳಿದ್ದೆವು, ಆದರೆ ಇಂದು 300 ಕ್ಕೂ ಹೆಚ್ಚು ಉದ್ಯೋಗಿಗಳ ತಂಡವಾಗಿದ್ದೇವೆ. ಇದಕ್ಕೆಲ್ಲಾ ಲೇಖಕರು ನಮ್ಮ ಮೇಲಿಟ್ಟ ನಂಬಿಕೆಯೇ ಕಾರಣ. ಸರಿಸುಮಾರು 8 ರಿಂದ 9 ವರ್ಷಗಳ ಕಾಲ ಲೇಖಕರಿಗೆ ಯಾವುದೇ ಆದಾಯ ಸಿಗದಿದ್ದರೂ ಅವರು ಪ್ರತಿಲಿಪಿಯನ್ನು ನಂಬಿದ್ದರು. ಅದರ ಫಲವಾಗಿ, ಕಳೆದ ತಿಂಗಳು ಒಂದರಲ್ಲೇ ಪ್ರತಿಲಿಪಿಯ ಹನ್ನೆರೆಡು ಭಾಷೆಗಳ 10,381 ಲೇಖಕರು ಒಟ್ಟಾಗಿ ₹3.12 ಕೋಟಿ ರೂಪಾಯಿಗಳನ್ನು ಗಳಿಸಿದ್ದಾರೆ.

ಈ ಪತ್ರಕ್ಕಾಗಿ, ನೀವು ಪ್ರತಿಲಿಪಿಯಲ್ಲಿ ಯಶಸ್ವಿಯಾಗಲು ಸಹಾಯ ಮಾಡುವಂತೆ ನಮ್ಮ ತಂಡದ 12 ಸದಸ್ಯರಿಗೆ ತಲಾ ಒಂದೊಂದು ಉಪಯುಕ್ತ ಸಲಹೆಯನ್ನು ಹಂಚಿಕೊಳ್ಳಲು ಕೇಳಿಕೊಂಡಿದ್ದೆವು.

1. ಒಂದು ವೇಳೆ ನೀವು ಇನ್ನೂ ಸಹ ಪ್ರತಿಲಿಪಿಯ ನಿಮ್ಮ ಬರಹಗಳಿಂದ ಆದಾಯ ಗಳಿಸುತ್ತಿಲ್ಲವೆಂದಾದರೆ, ಆದಾಯ ಗಳಿಸಲು ದಾರಿ ಇಲ್ಲಿದೆ: ಒಮ್ಮೆ ನೀವು 200 ಹಿಂಬಾಲಕರನ್ನು ಹೊಂದಿ, ಆ ಬಳಿಕ ಯಾವುದೇ ಮೂವತ್ತು ದಿವಸಗಳಲ್ಲಿ ಕನಿಷ್ಠ 5 ಕೃತಿಗಳು ಅಥವಾ ಧಾರಾವಾಹಿಯ ಅಧ್ಯಾಯಗಳನ್ನು ಪ್ರಕಟಿಸಿದರೆ, ನಿಮಗೆ ಸ್ವಯಂಚಾಲಿತವಾಗಿ ಗೋಲ್ಡನ್ ಬ್ಯಾಡ್ಜ್ ದೊರೆಯುತ್ತದೆ. ಆನಂತರ ನೀವು ನಿಮ್ಮ ಧಾರಾವಾಹಿಯನ್ನು ಸಬ್‌ಸ್ಕ್ರಿಪ್ಷನ್‌ ವಿಭಾಗಕ್ಕೆ ಸೇರಿಸಿ ಗಳಿಕೆಯನ್ನು ಆರಂಭಿಸಬಹುದು.

2. ಪ್ರತಿಲಿಪಿಯ ಓದುಗರು ಸುದೀರ್ಘ ಧಾರಾವಾಹಿಗಳನ್ನು ಇಷ್ಟಪಡುತ್ತಾರೆ! ಪ್ರತಿಯೊಂದು ಅಧ್ಯಾಯವನ್ನು ಕನಿಷ್ಠ 600 ರಿಂದ 800 ಕ್ಕೂ ಹೆಚ್ಚು ಪದಗಳಲ್ಲಿ ಬರೆಯಿರಿ. ಓದುಗರಲ್ಲಿ ಕುತೂಹಲ ಮೂಡಿಸುವಂತಹ ತಿರುವಿನೊಂದಿಗೆ ಪ್ರತಿ ಅಧ್ಯಾಯವನ್ನು ಕೊನೆಗೊಳಿಸಲು ಪ್ರಯತ್ನಿಸಿ. ಕಥೆಯ ಆರಂಭದಲ್ಲೇ ಆಕರ್ಷಕ ತಿರುವುಗಳನ್ನು ಪರಿಚಯಿಸಿ ಹಾಗೂ ಅಧ್ಯಾಯಗಳನ್ನು ಕುತೂಹಲ, ರೋಮಾಂಚನ ಅಥವಾ ರೋಚಕ ಘಟ್ಟದೊಂದಿಗೆ (ಕ್ಲಿಫ್‌ಹ್ಯಾಂಗರ್) ಮುಕ್ತಾಯಗೊಳಿಸಿ. ಕಥೆಯಲ್ಲಿ ಮುಂದೆ ಏನಾಗಬಹುದು ಎಂಬ ಆಸಕ್ತಿ ಮೂಡಿದಾಗ, ಓದುಗರು ಮುಂದಿನ ಅಧ್ಯಾಯಗಳನ್ನು ಅನ್‌ಲಾಕ್ ಮಾಡಿ ಓದಲು ಹೆಚ್ಚು ಉತ್ಸುಕರಾಗುತ್ತಾರೆ.

3. ನೇರವಾಗಿ ಕಥೆಯನ್ನೇ ಪ್ರಾರಂಭಿಸಿ: ಯಾವುದೇ ಟಿಪ್ಪಣಿಗಳು, ಪೀಠಿಕೆ, ಪರಿಚಯ ಅಥವಾ ಓದುಗರನ್ನು ಉದ್ದೇಶಿಸಿ ಮಾತನಾಡುವುದರ ಬದಲು, ಮೊದಲ ಅಧ್ಯಾಯದಲ್ಲಿಯೇ ನೇರವಾಗಿ ಕಥೆಯನ್ನು ಆರಂಭಿಸಿ.

4. ಮೊದಲ ಅಧ್ಯಾಯವು ಓದುಗರಲ್ಲಿ ತೀವ್ರ ಕುತೂಹಲವನ್ನು ಹುಟ್ಟುಹಾಕಬೇಕು:  ಇದರಿಂದ ಅವರು ಸ್ವಾಭಾವಿಕವಾಗಿಯೇ ಮುಂದಿನ ಅಧ್ಯಾಯಗಳನ್ನು ಓದಲು ಇಚ್ಛಿಸುತ್ತಾರೆ. ಹಾಗೆಯೇ ನಿಮ್ಮ ಮೂರನೇ ಅಧ್ಯಾಯವನ್ನು ಅತ್ಯಂತ ರೋಚಕವಾದ ಘಟ್ಟದಲ್ಲಿ ಕೊನೆಗೊಳಿಸಿ. ಓದುಗರು ಮೂರನೇ ಅಧ್ಯಾಯದವರೆಗೆ ಕಥೆಗೆ ಮಾರುಹೋದರೆ, ಅವರು ಉಳಿದ ಅಧ್ಯಾಯಗಳನ್ನು ಖಂಡಿತವಾಗಿಯೂ ಆಸಕ್ತಿಯಿಂದ ಮತ್ತು ಹದಿನೈದನೆಯ ಅಧ್ಯಾಯದ ನಂತರ ಮುಂದಿನ ಅಧ್ಯಾಯಗಳನ್ನು  ಅನ್‌ಲಾಕ್ ಮಾಡಿ ಓದುತ್ತಾರೆ.

5. ಓದುಗರ ಬಳಗವನ್ನು ಬೆಳೆಸುವಲ್ಲಿ ನಿರಂತರತೆಯು ಅತ್ಯಂತ ಪ್ರಮುಖವಾದ ಅಂಶಗಳಲ್ಲಿ ಒಂದಾಗಿದೆ:  ಹೊಸ ಅಧ್ಯಾಯಗಳು ಯಾವಾಗ ಪ್ರಕಟವಾಗುತ್ತವೆ ಎಂದು ತಿಳಿದುಕೊಳ್ಳಲು ಓದುಗರು ಇಷ್ಟಪಡುತ್ತಾರೆ ಮತ್ತು ನಿಯಮಿತವಾಗಿ ಪ್ರಕಟಿಸುವುದರಿಂದ ನಿಮ್ಮ ಕಥೆಗಳು ವೇದಿಕೆಯಲ್ಲಿ ಮುಂಚೂಣಿಯಲ್ಲಿರುತ್ತವೆ. ನೀವು ಪ್ರತಿದಿನ ಪ್ರಕಟಿಸಿ ಅಥವಾ ವಾರದಲ್ಲಿ ೪-೫ ಬಾರಿ ಪ್ರಕಟಿಸಿ.  ಒಂದು ನಿರ್ದಿಷ್ಟ ಸಮಯದ ವೇಳಾಪಟ್ಟಿಯು ಓದುಗರು ನಿಮ್ಮ ಕಥೆಗಳಿಗೆ ಮರಳಿ ಬರುವ ಅಭ್ಯಾಸವನ್ನು ಬೆಳೆಸಿಕೊಳ್ಳಲು ಸಹಾಯ ಮಾಡುತ್ತದೆ.

6. ನಿಮ್ಮ ಧಾರಾವಾಹಿಯನ್ನು ಯಾವಾಗಲೂ ಪೂರ್ಣಗೊಳಿಸಿ:  ನೀವು ಕಥೆಯನ್ನು ಯಶಸ್ವಿಯಾಗಿ ಮುಕ್ತಾಯಗೊಳಿಸುತ್ತೀರಿ ಎಂದು ತಿಳಿದರೆ ಓದುಗರು ನಿಮ್ಮನ್ನು ನಂಬುತ್ತಾರೆ ಮತ್ತು ನಿಮ್ಮ ಪ್ರತಿಯೊಂದು ಹೊಸ ಧಾರಾವಾಹಿಯನ್ನೂ ಓದಲು ಪ್ರಾರಂಭಿಸುತ್ತಾರೆ. ಈ ಮೂಲಕ ನಿಮ್ಮ ಧಾರಾವಾಹಿಯು ಹೆಚ್ಚಿನ ಓದುಗರನ್ನು ತಲುಪುತ್ತದೆ ಮತ್ತು ನಿಮ್ಮ ಆದಾಯವೂ ಹೆಚ್ಚಾಗುತ್ತದೆ.

7. ಆಕರ್ಷಕ ಮುಖಚಿತ್ರಗಳನ್ನು (ಕವರ್ ಇಮೇಜ್) ರಚಿಸಲು ಎಐ (AI) ತಂತ್ರಜ್ಞಾನವನ್ನು ಬಳಸಿ:  ಸೆಲೆಬ್ರಿಟಿಗಳ ಫೋಟೋಗಳನ್ನು ಅಥವಾ ಗೂಗಲ್‌ನಿಂದ ನೇರವಾಗಿ ಡೌನ್‌ಲೋಡ್ ಮಾಡಿದ ಚಿತ್ರಗಳನ್ನು ಬಳಸಬೇಡಿ. ಬದಲಿಗೆ ಕಥೆಗೆ ಸೂಕ್ತವೆನಿಸುವ ಆಕರ್ಷಕ ಚಿತ್ರಗಳನ್ನು ನೀವೇ ರಚಿಸಿ ಅದನ್ನು ಮುಖಚಿತ್ರವನ್ನಾಗಿ ಮಾಡಿ. 

8. ಕಥೆಯನ್ನು ರಚಿಸಲು ಸಂಪೂರ್ಣವಾಗಿ ಕೃತಕ ಬುದ್ಧಿಮತ್ತೆ ಬಳಸದಿರಿ:  ಓದುಗರು ನಿಮ್ಮ ಸ್ವಂತ ಹಾಗೂ ನೈಜ ಶೈಲಿಯನ್ನು ಇಷ್ಟಪಟ್ಟು ಬರುತ್ತಾರೆ. ಸಂಪೂರ್ಣವಾಗಿ ಎಐ ಮೂಲಕ ಸೃಜಿಸಿದ ಕಥೆಗಳು ಓದುಗರ ಮನಸ್ಸನ್ನು ಅಷ್ಟಾಗಿ ಮುಟ್ಟುವುದಿಲ್ಲ. ಕಥಾವಸ್ತುವಿನಲ್ಲಿ ಎಲ್ಲಾದರೂ ಗೊಂದಲವಿದ್ದರೆ ಅಥವಾ ಕಲ್ಪನೆಗಳನ್ನು ಸ್ಪಷ್ಟಪಡಿಸಿಕೊಳ್ಳುವ ಮಾಹಿತಿಗಾಗಿ ಮತ್ತು ನೈಜ ಘಟನೆ, ಸ್ಥಳ ಅಥವಾ ವ್ಯಕ್ತಿಗಳ ಕುರಿತ ಮಾಹಿತಿ(ಕೃತಿಗೆ ಅಗತ್ಯವಿದ್ದಲ್ಲಿ)ಗಳನ್ನು ಸಂಪಾದಿಸಲು ಎಐ ಸಹಾಯ ಮಾಡಬಲ್ಲದು. ಉತ್ತಮ ಲೇಖಕರು ಎಐ ಅನ್ನು ಒಬ್ಬ ಸಹಾಯಕನನ್ನಾಗಿ ಬಳಸುತ್ತಾರೆಯೇ ಹೊರತು, ಕಥೆ ಬರೆಯುವ ಲೇಖಕನನ್ನಾಗಿ ಅಲ್ಲ.

9. ಪ್ರೇಮಕಥೆಗಳಲ್ಲದೇ ಬೇರೆ ವಿಭಿನ್ನ ಪ್ರಕಾರಗಳನ್ನು ಪ್ರಯತ್ನಿಸಿ: ಓದುಗರು ಹಾರರ್, ಅಲೌಕಿಕ (ಸೂಪರ್ ನ್ಯಾಚುರಲ್), ಥ್ರಿಲ್ಲರ್, ಸಸ್ಪೆನ್ಸ್, ಸೈನ್ಸ್ ಫಿಕ್ಷನ್, ಪುರಾಣ ಮತ್ತು ಕೌಟುಂಬಿಕ ಕಥೆಗಳನ್ನು ಇಷ್ಟಪಡುತ್ತಾರೆ.

10. ಸಾಮಾಜಿಕ ಜಾಲತಾಣಗಳನ್ನು ಪರಿಣಾಮಕಾರಿಯಾಗಿ ಬಳಸಿ:  ನಿಮ್ಮ ಪ್ರತಿಲಿಪಿ ಪ್ರೊಫೈಲ್ ಕುರಿತು ರೀಲ್ಸ್ ಮಾಡಿ ಮತ್ತು ನಮ್ಮ ಪ್ರತಿಲಿಪಿಕನ್ನಡದ ಇನ್ಸ್ಟಾಗ್ರಾಮ್ ಖಾತೆಯೊಂದಿಗೆ ಕೊಲ್ಯಾಬೊರೇಟ್ ಮಾಡಿ. ನಿಮ್ಮ ರೀಲ್ಸ್‌ಗಳಲ್ಲಿ ನಿಮ್ಮ ಕೃತಿಗಳ ಕುರಿತು ಕುತೂಹಲಭರಿತ ಮಾಹಿತಿಗಳನ್ನು ನೀಡುವುದಷ್ಟೇ ಅಲ್ಲದೇ, ನಿಮ್ಮ ಯಾವುದೇ ಸಾಧನೆ ಅಥವಾ ಮೈಲಿಗಲ್ಲುಗಳ ಕುರಿತೂ ಸಹ  ಮಾಹಿತಿ ನೀಡಬಹುದು. ಅಂದರೆ ನಿಮ್ಮ ಹಿಂಬಾಲಕರು, ಗಳಿಕೆ ಮತ್ತು ಓದಿನ ಸಂಖ್ಯೆಯ ಬೆಳವಣಿಗೆಯನ್ನು ಪ್ರದರ್ಶಿಸಲು ಹಿಂಜರಿಯಬೇಡಿ. ಕೆಲವೊಮ್ಮೆ, ನಿಮ್ಮ ಓದುಗರು ಇಷ್ಟಪಡುವ ಕಥೆಯನ್ನು ಪ್ರಚಾರ ಮಾಡಲು ಅವರ ಸಹಾಯವನ್ನು ಕೇಳಿ. ನೀವು ಈ ಕಾರ್ಯಕ್ರಮದಲ್ಲೂ ಭಾಗವಹಿಸಬಹುದು: ಪ್ರತಿಲಿಪಿ ಇನ್ಫ್ಲ್ಯೂಯೆನ್ಸರ್ ಪ್ರೋಗ್ರಾಮ್

11. ಅಭಿಪ್ರಾಯಗಳು ಮತ್ತು ವಿಮರ್ಶೆಗಳನ್ನು ಸಕಾರಾತ್ಮಕವಾಗಿ ಸ್ವೀಕರಿಸಿ:  ಅವುಗಳಿಂದ ಕಲಿಯಿರಿ, ಆದರೆ ವಿಮರ್ಶಕರೊಂದಿಗೆ ವಾದ ಮಾಡಬೇಡಿ. ಅತ್ಯುತ್ತಮ ಲೇಖಕರು ಸೃಜನಶೀಲತೆಯ ಕಡೆಗೆ ಗಮನ ಹರಿಸುತ್ತಾರೆಯೇ ಹೊರತು ಟೀಕೆಗಳ ಕಡೆಯಲ್ಲ. ಪ್ರತಿಲಿಪಿಯ ಶಿಫಾರಸು ವ್ಯವಸ್ಥೆಯು ರೇಟಿಂಗ್‌ಗಳನ್ನು ಅವಲಂಬಿಸಿರುವುದಿಲ್ಲ. ಅದು ಓದುಗರ ನೈಜ ಓದುವ ನಡವಳಿಕೆಯನ್ನು ಆಧರಿಸಿ ಕಾರ್ಯನಿರ್ವಹಿಸುತ್ತದೆ.

12. ಬರಹದಲ್ಲಿ ಶಿಸ್ತನ್ನು ಬೆಳೆಸಿಕೊಳ್ಳಲು ನೀವು ಬಯಸಿದರೆ, ಸ್ಪರ್ಧೆಗಳಲ್ಲಿ ಭಾಗವಹಿಸಲು ಪ್ರಯತ್ನಿಸಿ. ನಾವು ಇತ್ತೀಚೆಗಷ್ಟೇ ಹೊಸ ಸ್ಪರ್ಧೆಯನ್ನು ಆರಂಭಿಸಿದ್ದೇವೆ: ಪ್ರತಿಲಿಪಿ ಕಥಾ ಅವಾರ್ಡ್ಸ್ ಸೀಸನ್ 3
    
    

ಮತ್ತೊಂದು ಅಚ್ಚರಿ!

ನೀವು ಐಫೋನ್ (iPhone) ಬಳಕೆದಾರರಾಗಿದ್ದರೆ, ಮುಂಬರುವ ವಾರಗಳಲ್ಲಿ ಐಫೋನ್‌ಗಳಲ್ಲಿ ಹೊಸದಾಗಿ ‘ಬರೆಯಿರಿ’ ಸೌಲಭ್ಯವನ್ನು ಹೊಂದಲಿದ್ದೀರಿ. :)

ಓದಿ ವಿಮರ್ಶಿಸುವ ಮತ್ತು ಬರೆದು ಪ್ರಕಟಿಸಿ ಓದುಗರ ಮನಗೆಲ್ಲುವ ಕೌಶಲ್ಯ ನಿಮ್ಮದಾಗಲಿ ಎಂದು ಹಾರೈಸುತ್ತೇವೆ!

ನಾವು ನಿಮಗೆ ನೀಡಬಯಸುವ ಇನ್ನೊಂದು ಮುಖ್ಯ ಭರವಸೆಯೆಂದರೆ: ನಾವು ನಿಮ್ಮ ಮಾತುಗಳನ್ನು ಆಲಿಸುತ್ತೇವೆ!

ಪ್ರತಿಲಿಪಿಯಲ್ಲಿ ನಿಮ್ಮ ಅನುಭವ ಹೇಗಿದೆ? ನಿಮಗೆ ಇಲ್ಲಿ ಏನು ಇಷ್ಟವಾಯಿತು ಮತ್ತು ಏನನ್ನು ಸರಿಪಡಿಸಬೇಕಿದೆ? ನಾವು ಯಾವೆಲ್ಲಾ ಹೊಸ ಸೌಲಭ್ಯಗಳನ್ನು ತರಬೇಕೆಂದು ನೀವು ಬಯಸುತ್ತೀರಿ? ಇವೆಲ್ಲವನ್ನೂ ಈ ಕೆಳಗಿನ ಸರ್ವೇ ಲಿಂಕ್ ಭರ್ತಿ ಮಾಡುವ ಮೂಲಕ ನಮ್ಮೊಂದಿಗೆ ಹಂಚಿಕೊಳ್ಳಿ:ಸರ್ವೇ ಫಾರ್ಮ್ 

ನಿಮ್ಮ ಪ್ರತಿಯೊಂದು ಅಭಿಪ್ರಾಯವನ್ನೂ ನಮ್ಮ ತಂಡವು ಸೂಕ್ಷ್ಮವಾಗಿ ಗಮನಿಸುತ್ತದೆ.

ಶುಭವಾಗಲಿ 

ಪ್ರತಿಲಿಪಿಕನ್ನಡ ಬಳಗ