ಪ್ರತಿಲಿಪಿಪ್ರತಿಲಿಪಿಯ ಆತ್ಮೀಯ ಪತ್ರ
ಆತ್ಮೀಯ ಸಾಹಿತಿಗಳೇ,
ದೀರ್ಘಕಾಲದಿಂದ ನಿಮಗೆ ಈ ಪತ್ರವನ್ನು ಬರೆಯಬೇಕು ಎಂಬ ಹಂಬಲ ನಮ್ಮದಾಗಿತ್ತು. ಇದು ಕೇವಲ ಒಂದು ಸಂಸ್ಥೆಯ ಅಧಿಕೃತ ಸಂದೇಶವಲ್ಲ; ಬದಲಿಗೆ 'ಪ್ರತಿಲಿಪಿ'ಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಸಹೃದಯಿಗಳ ಮಾತು! ಪ್ರತಿಲಿಪಿ ತಂಡದ ಬಹುಪಾಲು ಸದಸ್ಯರು ಕೂಡ ನಿಮ್ಮಂತೆ ಬರಹಗಾರರೇ ಆಗಿರುವುದರಿಂದ ಕೃತಿಯ ಕಲ್ಪನೆ, ಅದರ ಬರಹ ರೂಪ, ಕಥೆಯನ್ನು ವಿಸ್ತರಿಸುವಲ್ಲಿನ ಸವಾಲು, ವಿವಿಧ ತಿರುವುಗಳನ್ನು ಅಚ್ಚರಿಗಳನ್ನು ಓದುಗರಿಗೆ ನೀಡುವಾಗಿನ ಕಾತರ, ಭಯ ಮತ್ತು ಪ್ರಕಟಿಸಿದ ಬಳಿಕದ ನಿರಾಳತೆ ಇವುಗಳನ್ನೆಲ್ಲ ನಾವು ಚೆನ್ನಾಗಿ ಅರ್ಥ ಮಾಡಿಕೊಂಡಿದ್ದೇವೆ.
ಓದುಗರು ಕತೆಯನ್ನು ಓದಿದಾಗ, ಅವರಿಗೆ ಕಾಣುವುದು ಕೇವಲ ಪ್ರಕಟವಾದ ಸಾಲುಗಳು ಮಾತ್ರ. ಆದರೆ ಆ ಹಂತವನ್ನು ತಲುಪಲು ಒಬ್ಬ ಲೇಖಕ ಪಟ್ಟ ಕಷ್ಟ, ವಿನಿಯೋಗಿಸಿದ ಸಮಯ ಮತ್ತು ತ್ಯಾಗ ಲೇಖಕನಿಗಷ್ಟೇ ಗೊತ್ತು. ದೈನಂದಿನ ಉದ್ಯೋಗ/ವ್ಯವಹಾರ, ಮನೆಯ ಜವಾಬ್ದಾರಿಗಳು, ಓದು, ಆರೋಗ್ಯ ಸಮಸ್ಯೆಗಳು ಮತ್ತು ಸಾಂಸಾರಿಕ ಜಂಜಡಗಳ ನಡುವೆ ಸಿಗುವ ಅಲ್ಪ ಸಮಯದಲ್ಲಿ ಬರೆಯುವುದು, ಬದುಕು ಮತ್ತು ಬರಹದ ನಡುವೆ ಸಮತೋಲನ ಕಾಯ್ದುಕೊಳ್ಳುವುದು, ಹೇಳಲಾಗದ ಕತೆಯನ್ನು ದಿನಗಟ್ಟಲೆ ಮನಸ್ಸಿನಲ್ಲೇ ಹೊತ್ತು ತಿರುಗುವುದು, ಆಗಾಗ ಕಾಡುವ ಆತ್ಮವಿಶ್ವಾಸದ ಕೊರತೆ, ಅರ್ಧಕ್ಕೆ ನಿಂತ ಕರಡು ಪ್ರತಿಗಳು, ಪ್ರಕಟಿಸುವಾಗ ಕಾಡುವ ಆತಂಕ... ಇವೆಲ್ಲದರ ನಡುವೆಯೂ ನನ್ನ ಕಥೆ ಪ್ರತಿಲಿಪಿಯ ಮೂಲಕ ಸಾವಿರಾರು ಅರ್ಹ ಓದುಗರನ್ನು ತಲುಪುತ್ತದೆ ಎಂಬ ಆಶಯವಿದೆಯಲ್ಲವೇ? ಅದುವೇ ನಿಮ್ಮ ಬರಹದ ಶಕ್ತಿ.
ಬರವಣಿಗೆ ಎಂಬುದು ಕೆಲವೊಮ್ಮೆ ಏಕಾಂಗಿತನದಿಂದ ಕೂಡಿರಬಹುದು, ಆದರೆ ಅದು ನೋವಿಗೆ ಮದ್ದಾಗಬಲ್ಲದು. ಪ್ರತಿಲಿಪಿಯಲ್ಲಿ ಪ್ರಕಟಗೊಂಡ ನನ್ನ ಬರಹಗಳ ಮೂಲಕ ಗಳಿಸಿದ ಸಂಪಾದನೆ ನನ್ನ ಯಾವುದೋ ದೊಡ್ಡ ಸಂಕಷ್ಟದಿಂದ ಪಾರು ಮಾಡಿತು, ವೈಯಕ್ತಿಕ ನಷ್ಟ/ನೋವಿನ ಸಮಯದಲ್ಲಿ ಅಥವಾ ಆಂತರಿಕ ಸಂಘರ್ಷಗಳ ಸಂದರ್ಭದಲ್ಲಿ ಓದುಗರ ಅಭಿಪ್ರಾಯ ವಿಮರ್ಶೆಗಳು ಹೊಸ ಉತ್ಸಾಹ ಸ್ಫೂರ್ತಿ ನೀಡಿದವು, ಜೀವನವನ್ನು ಧನಾತ್ಮಕವಾಗಿ ನೋಡಲು ಓದುಗರ ಪ್ರೀತಿಯ ಅಭಿಮಾನದ ಸಂದೇಶ, ಸಾಂತ್ವನಗಳು ನೆರವಾದವು ಎಂಬರ್ಥದ ಸಂದೇಶಗಳು ಅಭಿಪ್ರಾಯಗಳು ನಮಗೆ ಆಗಾಗ ಬರುತ್ತಿರುತ್ತವೆ. ಹಾಗಾಗಿಯೇ ನಾವು ಬರವಣಿಗೆಯನ್ನು ಅತ್ಯಂತ ಗೌರವಯುತವಾದ ಕೌಶಲ್ಯ ಎಂದು ಭಾವಿಸುತ್ತೇವೆ.
ಕಳೆದ ಕೆಲವು ತಿಂಗಳುಗಳಿಂದ ಪ್ರತಿಲಿಪಿಯ ಬೇರೆ ಬೇರೆ ಭಾಷೆಗಳಲ್ಲಿ ನಮ್ಮ 'ವೀಕ್ಲಿ ಕಮ್ಯುನಿಟಿ ಸೆಷನ್ಸ್' ಮೂಲಕ ನಾವು ನಿಮ್ಮಲ್ಲಿ ಅನೇಕರೊಂದಿಗೆ ಸಂವಾದ ನಡೆಸಿದ್ದೇವೆ. ಈ ಸಂದರ್ಭದಲ್ಲಿ ಒಂದು ಮುಖ್ಯವಾದ ಪ್ರಶ್ನೆ ನಮ್ಮನ್ನು ಕಾಡುತ್ತಿದೆ: ಪ್ರೇಮಕಥೆಗಳ ಹೊರತಾಗಿ ಇತರ ಪ್ರಕಾರದ ಕಥೆಗಳು ಹೆಚ್ಚು ಓದುಗರನ್ನು ತಲುಪುವುದು ಹೇಗೆ?
ಖಂಡಿತವಾಗಿಯೂ ಪ್ರತಿಲಿಪಿಯಲ್ಲಿ ಪ್ರೇಮಕಥೆಗಳಿಗೆ ಯಾವಾಗಲೂ ವಿಶೇಷ ಸ್ಥಾನವಿದ್ದೇ ಇರುತ್ತದೆ. ಆದರೆ ಹಾರರ್, ಸಸ್ಪೆನ್ಸ್ ಮತ್ತು ಕ್ರೈಮ್ ಥ್ರಿಲ್ಲರ್ನಂತಹ ಪ್ರಕಾರಗಳಿಗೂ ಉತ್ತಮ ವೇದಿಕೆ ಕಲ್ಪಿಸಿಕೊಟ್ಟಾಗ, ಲೇಖಕರು ಓದುಗರ ಸಂಖ್ಯೆ ಅಥವಾ ಆದಾಯದ ಬಗ್ಗೆ ಚಿಂತಿಸದೆ ಮುಕ್ತವಾಗಿ ಪ್ರಯೋಗಗಳನ್ನು ಮಾಡಲು ಸಾಧ್ಯವಾಗುತ್ತದೆ. ಈ ನಿಟ್ಟಿನಲ್ಲಿ ನಾವು ಸಕ್ರಿಯವಾಗಿ ಕೆಲಸ ಮಾಡುತ್ತಿದ್ದೇವೆ.
ಅದರ ಮೊದಲ ಹೆಜ್ಜೆಯಾಗಿ, ನಾವು ಹಾರರ್, ಕ್ರೈಮ್ ಥ್ರಿಲ್ಲರ್ ಅಥವಾ ಫ್ಯಾಂಟಸಿ ಕಥೆಗಳಿಗಾಗಿ ಹೊಸ ಸ್ಪರ್ಧೆಯನ್ನು ಆಯೋಜಿಸಿದ್ದೇವೆ. ಈ ಕ್ಲಿಕ್ ಮಾಡುವ ಮೂಲಕ ನೀವು ಭಾಗವಹಿಸಬಹುದು ಮತ್ತು ನಿಮ್ಮ ಓದುಗರ ಬಳಗವನ್ನು ವಿಸ್ತರಿಸಿಕೊಳ್ಳಬಹುದು : https://kannada.pratilipi.com/event/cq0fu1hnqh
ನಾವು ನಿಮಗೆ ನೀಡಬಯಸುವ ಇನ್ನೊಂದು ಮುಖ್ಯ ಭರವಸೆಯೆಂದರೆ: ನಾವು ನಿಮ್ಮ ಮಾತುಗಳನ್ನು ಆಲಿಸುತ್ತೇವೆ.
ಪ್ರತಿಲಿಪಿಯಲ್ಲಿ ನಿಮ್ಮ ಅನುಭವ ಹೇಗಿದೆ? ನಿಮಗೆ ಇಲ್ಲಿ ಏನು ಇಷ್ಟವಾಯಿತು ಮತ್ತು ಏನನ್ನು ಸರಿಪಡಿಸಬೇಕಿದೆ? ನಾವು ಯಾವೆಲ್ಲಾ ಹೊಸ ಸೌಲಭ್ಯಗಳನ್ನು ತರಬೇಕೆಂದು ನೀವು ಬಯಸುತ್ತೀರಿ? ಇವೆಲ್ಲವನ್ನೂ ಈ ಕೆಳಗಿನ ಸರ್ವೇ ಲಿಂಕ್ ಭರ್ತಿ ಮಾಡುವ ಮೂಲಕ ನಮ್ಮೊಂದಿಗೆ ಹಂಚಿಕೊಳ್ಳಿ:
ನಿಮ್ಮ ಪ್ರತಿಯೊಂದು ಅಭಿಪ್ರಾಯವನ್ನೂ ನಮ್ಮ ತಂಡವು ಸೂಕ್ಷ್ಮವಾಗಿ ಗಮನಿಸುತ್ತದೆ.
ಬರೆದು ಪ್ರಕಟಿಸಿ ಓದುಗರ ಮನಗೆಲ್ಲಲು ಶ್ರಮಿಸುತ್ತಿರುವುದಕ್ಕಾಗಿ ಧನ್ಯವಾದಗಳು. ಹಲವು ಸವಾಲುಗಳ ನಡುವೆಯೂ ನಿಮ್ಮ ಸಾಹಿತ್ಯಿಕ ಪಯಣವನ್ನು ಮುಂದುವರೆಸುತ್ತಿರುವುದಕ್ಕಾಗಿ ವಂದನೆಗಳು. ಮತ್ತು ನಿಮ್ಮ ಮನಸ್ಸಿನ ಭಾವನೆ, ಕಲ್ಪನೆ ಮತ್ತು ವಿಚಾರಗಳನ್ನು ಅಕ್ಷರ ರೂಪದಲ್ಲಿ ಪ್ರತಿಲಿಪಿಯಲ್ಲಿ ಪ್ರಕಟಿಸಿ ಓದುಗರನ್ನು ಸಂತಸಪಡಿಸುತ್ತಿರುವುದಕ್ಕೆ ನಾವು ನಿಮಗೆ ಆಭಾರಿಯಾಗಿದ್ದೇವೆ.
ನಿಮ್ಮ ವಿಶ್ವಾಸನೀಯ,
ಪ್ರತಿಲಿಪಿಕನ್ನಡ ಬಳಗ