ನಿಮ್ಮ ಪಾತ್ರಗಳು ನಮ್ಮ ಬದುಕನ್ನು ಬದಲಿಸಿವೆ !!

ಪ್ರೀತಿಯ ಲೇಖಕರೇ,

ನಾನು ರಂಜೀತ್.

ನಿಮ್ಮನ್ನು ಪತ್ರಮುಖೇನ ಸಂಪರ್ಕಿಸಬೇಕೆನ್ನುವುದು ನನ್ನ ಬಹುದಿನಗಳ ಕನಸು! ನಾನು ಇದನ್ನು ಪ್ರತಿಲಿಪಿಯ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿಯಾಗಿ ಅಥವಾ ಪ್ರತಿಲಿಪಿಯ ಸಂಸ್ಥಾಪಕನಾಗಿ ಹೇಳುತ್ತಿಲ್ಲ. ತನ್ನ ಕನಸುಗಳು ಮತ್ತು ಗುರಿಯನ್ನು ಈಡೇರಿಸಿಕೊಳ್ಳಲು ಹೆಗಲು ನೀಡಿದ ಪ್ರತಿಲಿಪಿಯ ಸಮಸ್ತ ಲೇಖಕ ಬಳಗಕ್ಕೆ ಚಿರಋಣಿಯಾಗಿರುವ ಒಬ್ಬ ಸಾಮಾನ್ಯ ಮನುಷ್ಯನಾಗಿ ಈ ಪತ್ರವನ್ನು ಬರೆಯುತ್ತಿದ್ದೇನೆ.

ಯಾವುದೇ ಬರಹಗಾರರು ತಮ್ಮ ಮನದ ಭಾವನೆ, ಕಲ್ಪನೆ ಮತ್ತು ವಿಚಾರಗಳನ್ನು ತಮ್ಮ ಬರಹಗಳ ಮೂಲಕ ಜಗತ್ತಿನೆದಿರು ತೆರೆದಿಡಲು ಭಾಷೆ, ತಂತ್ರಜ್ಞಾನ ಅಥವಾ ಭೌಗೋಳಿಕ ಅಡೆತಡೆಗಳನ್ನು ಮೀರಿದ ವೇದಿಕೆಯನ್ನು ಮುಂದೊಂದು ದಿನ ನಾವು ನಿರ್ಮಿಸುತ್ತೇವೆ ಎಂಬ ಕನಸು ನನಗಿತ್ತು.

ಬೆಂಗಳೂರಿನ ಒಂದು ಸಣ್ಣ ಫ್ಲಾಟ್‌ನಲ್ಲಿ ಐವರು ವ್ಯಕ್ತಿಗಳು ಸೇರಿ 'ಪ್ರತಿಲಿಪಿ'ಯನ್ನು ಆರಂಭಿಸಿದ್ದು ನನಗೆ ಇಂದಿಗೂ ನೆನಪಿದೆ. ನಮ್ಮ ಬಳಿ ಸೀಮಿತ ಸಂಪನ್ಮೂಲಗಳಿದ್ದವು. ಜಗತ್ತಿಗೆ ನಾವು ಯಾರೆಂದೇ ತಿಳಿದಿರಲಿಲ್ಲ. ಆದರೆ ಅಂತಹ ಸಮಯದಲ್ಲಿ ನೀವು, ಅಂದರೆ ನಮ್ಮ ಲೇಖಕರು ನಮ್ಮೊಂದಿಗೆ ಬಂದಿರಿ!

ಇನ್ನೂ ಅಂಬೆಗಾಲಿಡುತ್ತಿದ್ದ ವೇದಿಕೆಗೆ ನೀವು ನಿಮ್ಮ ಪಾತ್ರಗಳನ್ನು ಮತ್ತು ಕಥನಗಳನ್ನು ನೀಡಿದಿರಿ. 

ಕಳೆದ 11 ವರ್ಷಗಳಲ್ಲಿ ನಮ್ಮ ಪ್ರಯಾಣದಲ್ಲಿ ಅಸಂಖ್ಯಾತ ಕಷ್ಟದ ಸಮಯಗಳು ಬಂದಿವೆ. ದಾರಿ ಕಾಣದೆ ಅಸಾಧ್ಯವೆನಿಸಿದ ಎಷ್ಟೋ ಕ್ಷಣಗಳಿದ್ದವು. ಆದರೆ ಪ್ರತಿ ಬಾರಿ ನಾನು ಸೋಲೊಪ್ಪಿಕೊಳ್ಳಬೇಕೆಂದು ಅನಿಸಿದಾಗಲೂ, ಪ್ರತಿಲಿಪಿ ಆ್ಯಪ್ ತೆರೆದು ನಿಮ್ಮಲ್ಲನೇಕರ ಬರಹಗಳನ್ನು ಓದುತ್ತಿದ್ದೆ. ನೀವು ಕೇವಲ ಕಥೆಗಳನ್ನು ಪ್ರಕಟಿಸಲಿಲ್ಲ; ಬದಲಾಗಿ ನಮಗೆ ಭರವಸೆಯನ್ನು ನೀಡಿದಿರಿ. ನೀವು ಒಂದು ಸಣ್ಣ ಆಲೋಚನೆಯನ್ನು ಸ್ಟಾರ್ಟ್-ಅಪ್ ಆಗಿ ಮತ್ತು ಆ ಸ್ಟಾರ್ಟ್-ಅಪ್ ಅನ್ನು ಒಂದು ಕುಟುಂಬವಾಗಿ ಬದಲಾಯಿಸಿದಿರಿ.

ಈ ಕುಟುಂಬದಲ್ಲಿ ಇಂಜಿನಿಯರ್‌ಗಳು, ಪ್ರಾಡಕ್ಟ್ ಮ್ಯಾನೇಜರ್‌ಗಳು, ಭಾಷೆಗಳ ಸಮೂಹ ಮುಖ್ಯಸ್ಥರು, ವಕೀಲರು ಹೀಗೆ ಅನೇಕರಿದ್ದಾರೆ. ಆದರೆ ಎಲ್ಲಕ್ಕಿಂತ ಮುಖ್ಯವಾಗಿ ಈ ಎಲ್ಲ ಪ್ರಯತ್ನಗಳಿಗೂ ಸ್ಫೂರ್ತಿ ಮತ್ತು ಹುರುಪು ನೀಡುವಂತಹ ಸೃಜನಶೀಲರಾದ ನೀವಿದ್ದೀರಿ.

ಹೊಸ ವರ್ಷಕ್ಕೆ ಕಾಲಿಡುತ್ತಿರುವ ಈ ಶುಭಸಂದರ್ಭದಲ್ಲಿ, ನಾನು ನಿಮಗೆ ತಲೆಬಾಗಿ ಗೌರವ ಸಲ್ಲಿಸಲು ಬಯಸುತ್ತೇನೆ. ನಿಮ್ಮಿಂದಾಗಿಯೇ ನಾವು ಇಂದು ಈ ಹಂತಕ್ಕೆ ತಲುಪಿದ್ದೇವೆ ಮತ್ತು ನಿಮ್ಮ ಕಾರಣದಿಂದಲೇ ನಾವು ಇನ್ನೂ ಸುದೀರ್ಘ ಪಯಣದ ಕನಸು ಕಾಣಲು ಸಾಧ್ಯವಾಗಿದೆ.

ಸರಸ್ವತಿ ದೇವಿಯು ನಿಮಗೆ ಅಪಾರವಾದ ವಿದ್ಯಾಸಿರಿ ಮತ್ತು ಗೆಲುವನ್ನು ಕರುಣಿಸಲಿ. 2026 - ನಿಮ್ಮ ಕಲ್ಪನೆಯು ಅನಂತ ನದಿಯಂತೆ ಹರಿಯುವ ವರ್ಷವಾಗಲಿ. ನಿಮ್ಮ ಓದುಗರು ಪ್ರೀತಿಸುವ ಮತ್ತು ಅಭಿಮಾನಿಸುವ ಹೊಸ ಬರಹಗಳ ಮೂಲಕ ಅವರ ಮನಗೆದ್ದು ಇನ್ನಷ್ಟು ಆತ್ಮೀಯರಾಗುತ್ತೀರಿ ಎಂದು ನಾನು ನಂಬುತ್ತೇನೆ.

ನಮ್ಮ ಗುರಿಎಡೆಗಿನ ಪಯಣ ಈಗಷ್ಟೇ ಆರಂಭವಾಗಿದೆ! ಪ್ರತಿಲಿಪಿಯನ್ನು ಮುಂದಿನ ತಲೆಮಾರುಗಳು ನೆನಪಿಟ್ಟುಕೊಳ್ಳುವಂತಹ ಮಾದರಿ ಸಂಸ್ಥೆಯಾಗಿಸಲು ನಾವು ಶ್ರಮಿಸುತ್ತಿದ್ದೇವೆ. ನನ್ನ ವೈಯಕ್ತಿಕ ಕನಸು ತುಂಬಾ ಸರಳವಾಗಿದೆ: ಒಬ್ಬ ಬರಹಗಾರನಿಗೆ ತನ್ನ ಜೀವನೋಪಾಯಕ್ಕಾಗಿ ಬೇರೆ ಉದ್ಯೋಗದ ಅಗತ್ಯವಿರಬಾರದು ಮತ್ತು ಪ್ರತಿಲಿಪಿಯ ಆದಾಯವೇ ಅವರ ಕುಟುಂಬವನ್ನು ಸಲಹುವಂತಾಗಬೇಕು.

ನಿಮ್ಮಿಷ್ಟದ ಬರಹ ರಚನಾ ಕೌಶಲ್ಯವೇ ನಿಮ್ಮ ಜೀವನಕ್ಕೆ ಆಧಾರವಾಗುವಂತಹ ಭವಿಷ್ಯವನ್ನು ನಿರ್ಮಿಸಲು ನಾನು ಬಯಸುತ್ತೇನೆ. ಪ್ರತಿಲಿಪಿಯಲ್ಲಿನ ನಿಮ್ಮ ಗಳಿಕೆಯು, ನೀವು ಯಾವುದಕ್ಕಾಗಿ ಜನ್ಮತಾಳಿದ್ದೀರೋ ಆ ಕೆಲಸವನ್ನು (ಬರವಣಿಗೆಯನ್ನು) ಯಾವುದೇ ದೇಶಕಾಲಗಳ ಮಿತಿ/ಗಡಿ ಇಲ್ಲದೇ ಪ್ರಕಟಿಸಿ ಓದುಗರ ಎದುರು ತೆರೆದಿಡಲು ನಿಮಗೆ ಸದಾಕಾಲ ಅವಕಾಶ ನೀಡುವಂತಾಗಬೇಕು. 

ನಾವು ಪರಿಪೂರ್ಣರಲ್ಲ ಎಂಬುದು ನನಗೆ ತಿಳಿದಿದೆ. ಆದರೆ ನೀವು ನಮ್ಮನ್ನು ಹೊಗಳಿದಾಗಲೂ ಅಥವಾ ನಾವು ಎಲ್ಲಿ ಸುಧಾರಿಸಬೇಕು ಎಂದು ಹೇಳಿದಾಗಲೂ ನಾವು ಯಾವಾಗಲೂ ನಿಮ್ಮ ಮಾತನ್ನು ಆಲಿಸುತ್ತೇವೆ ಎಂದು ನಾನು ನಿಮಗೆ ಭರವಸೆ ನೀಡುತ್ತೇನೆ. ಈ ಬಳಗವನ್ನು (ವೇದಿಕೆಯನ್ನು) ಹೆಚ್ಚು ಸುರಕ್ಷಿತವಾಗಿ, ಪಾರದರ್ಶಕವಾಗಿ ಮತ್ತು ನಿಮ್ಮ ನಂಬಿಕೆಗೆ ಅರ್ಹವಾಗಿಸಲು ನಾವು ಪ್ರತಿದಿನ ಕೆಲಸ ಮಾಡುತ್ತಿದ್ದೇವೆ. ನಮ್ಮ ಲೇಖಕರ ಕುಟುಂಬವೇ ನಮ್ಮ ಅಸ್ತಿತ್ವಕ್ಕೆ ಕಾರಣ.

ಪ್ರತಿಲಿಪಿಯಲ್ಲಿ ನಿಮ್ಮ ಯಶಸ್ಸಿನ ಪಯಣವನ್ನು ನನ್ನೊಂದಿಗೆ ಹಂಚಿಕೊಳ್ಳಲು ಅಥವಾ ನಾವು ಇನ್ನೂ ಹೇಗೆ ಅತ್ಯುತ್ತಮ ವೇದಿಕೆಯಾಗಲು ಮುಂದಡಿ ಇಡಬಹುದು ಎಂಬುದರ ಕುರಿತು ನಿಮಗೇನಾದರೂ ಕಲ್ಪನೆ, ಸಲಹೆ, ಸೂಚನೆ ಅಥವಾ ಮಾರ್ಗದರ್ಶನಗಳಿದ್ದಲ್ಲಿ ನೀವು ನನಗಾಗಲಿ ಅಥವಾ ನಮ್ಮ ತಂಡದವರಿಗಾಗಲಿ ಯಾವಾಗ ಬೇಕಾದರೂ ಇಮೇಲ್ ಕಳುಹಿಸಬಹುದು. ನಾನು ಯಾವಾಗಲೂ [email protected] ನಲ್ಲಿ ಲಭ್ಯವಿರುತ್ತೇನೆ. ನೀವು ಕಳುಹಿಸುವ ವಿಷಯಕ್ಕೆ ಸಂಬಂಧಿಸಿದಂತೆ ಉತ್ತರಿಸಲು ನಾನು ಸರಿಯಾದ ವ್ಯಕ್ತಿಯಲ್ಲದಿದ್ದರೂ, ಅದು ಪ್ರತಿಲಿಪಿ ಬಳಗದ ಸಂಬಂಧಪಟ್ಟ ವ್ಯಕ್ತಿಯನ್ನು ತಲುಪುತ್ತದೆ ಎಂಬ ಭರವಸೆಯನ್ನು ನಾನು ನೀಡುತ್ತೇವೆ. 

ನಿಮಗೂ ಮತ್ತು ನಿಮ್ಮ ಕುಟುಂಬದವರಿಗೂ ಹೊಸ ವರ್ಷದ ಹಾರ್ದಿಕ ಶುಭಾಶಯಗಳು. ನಿಮ್ಮ ಜೀವನದಲ್ಲಿ ಸುಖ-ಸಮೃದ್ಧಿ ನೆಲೆಸಲಿ.

ಪ್ರತಿಲಿಪಿಯ ನಿಮ್ಮ ಬರಹಗಳ ಮೂಲಕ ಓದುಗರನ್ನು ಸಂತಸಪಡಿಸುತ್ತಿರುವುದಕ್ಕೆ ಅನಂತ ಅಭಿನಂದನೆಗಳು!!

ಕೃತಜ್ಞತೆಗಳೊಂದಿಗೆ,

ರಂಜಿತ್ ಪ್ರತಾಪ್ ಸಿಂಗ್

ಸಂಸ್ಥಾಪಕರು, ಪ್ರತಿಲಿಪಿ