ಪ್ರತಿಲಿಪಿಪ್ರಕಟಣೆಯ ಮಾರ್ಗಸೂಚಿ ನಿಯಮಗಳು
ಕೃತಕ ಬುದ್ಧಿಮತ್ತೆ (AI) ಬಳಕೆಯ ಕುರಿತ ಮಾರ್ಗಸೂಚಿಗಳು :
-
ವ್ಯಾಕರಣ ಮತ್ತು ಕಾಗುಣಿತವೂ ಸೇರಿದಂತೆ ಭಾಷಾ ಶುದ್ಧತೆಯ ಪರಿಶೀಲನೆಗಾಗಿ ಹಾಗೂ ಕಥೆಗೆ ಸೂಕ್ತ ಚೌಕಟ್ಟು ನಿರ್ಮಿಸಲು, ಕಥಾವಸ್ತುವಿನ ಕುರಿತ ಕಲ್ಪನೆಯನ್ನು ಇನ್ನಷ್ಟು ಸ್ಪಷ್ಟವಾಗಿಸಲು ಕೃತಕ ಬುದ್ಧಿಮತ್ತೆಯನ್ನು ಬಳಸಿಕೊಳ್ಳುವುದನ್ನು ಪ್ರತಿಲಿಪಿಯಲ್ಲಿ ಸದಾ ಸ್ವಾಗತಿಸಲಾಗುತ್ತದೆ.
-
ವಿಶೇಷವಾಗಿ ಲೇಖಕರಾಗಿ ನಿಮಗೆ ಕಥೆ ಮುಂದುವರಿಸಲು ಆಲೋಚನೆಗಳು ಅಥವಾ ಕಲ್ಪನೆಗಳು ಹೊಳೆಯದೇ ಇದ್ದಾಗ, ಕೃತಕ ಬುದ್ಧಿಮತ್ತೆಯು ನಿಮ್ಮ ಸೃಜನಶೀಲ ಸಹಾಯಕನಾಗಿ ನೆರವಾಗಬಹುದು. ನಿಮ್ಮ ಕೃತಿಗಳ ಮುಖಪುಟ ಚಿತ್ರಗಳನ್ನು ಸೃಜನಾತ್ಮಕವಾಗಿ ರಚಿಸಿಕೊಳ್ಳಲು ಕೂಡ ನೀವು ಇದನ್ನು ಬಳಸಿಕೊಳ್ಳಬಹುದು.
-
ಮೂಲ ಲೇಖಕರ ಅನುಮತಿ ಇಲ್ಲದೇ, ಹಕ್ಕುಸ್ವಾಮ್ಯ ಹೊಂದಿರುವ ಇತರರ ಯಾವುದೇ ಕೃತಿಗಳನ್ನು ಕೃತಕ ಬುದ್ಧಿಮತ್ತೆಯ ಮೂಲಕ ಅನುವಾದಿಸಿ ಪ್ರಕಟಿಸುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ.
-
ಜೊತೆಗೆ ಸಂಪೂರ್ಣವಾಗಿ ಕೃತಕ ಬುದ್ಧಿಮತ್ತೆಯಿಂದ ರಚಿಸಲಾದ ಕೃತಿಗಳನ್ನು ನಿಮ್ಮದೇ ಸ್ವಂತ ರಚನೆ ಎಂದು ಪ್ರಸ್ತುತಪಡಿಸಬೇಡಿ. ರಚನೆಯನ್ನು ಪ್ರಮುಖವಾಗಿ ಕೃತಕ ಬುದ್ಧಿಮತ್ತೆಯೇ ಮಾಡಿದ್ದರೆ, ನಂತರ ನೀವು ಸಣ್ಣಪುಟ್ಟ ಬದಲಾವಣೆಗಳನ್ನು ಮಾಡಿದ್ದರೂ ಸಹ ಅದನ್ನು ಕೃತಕ ಬುದ್ಧಿಮತ್ತೆಯಿಂದ ರಚಿತವಾದ ಕೃತಿ ಎಂದೇ ಪರಿಗಣಿಸಲಾಗುತ್ತದೆ.
ಅಶ್ಲೀಲ ಹಾಗೂ ಲೈಂಗಿಕ ವಿಷಯಗಳ ಕುರಿತ ಮಾರ್ಗಸೂಚಿಗಳು :
-
ಯಾವುದೇ ಕಥೆ, ಪಾತ್ರ ಅಥವಾ ಕಲಾತ್ಮಕ ಉದ್ದೇಶವಿಲ್ಲದೇ, ಕೇವಲ ಓದುಗರನ್ನು ಲೈಂಗಿಕವಾಗಿ ಪ್ರಚೋದಿಸುವ ಏಕೈಕ ಉದ್ದೇಶ ಹೊಂದಿರುವ ಬರಹಗಳು ಎಷ್ಟೇ ಚನ್ನಾಗಿ ರಚಿತವಾಗಿದ್ದರೂ ಅವುಗಳಿಗೆ ಪ್ರತಿಲಿಪಿ ಅನುಮತಿಸುವುದಿಲ್ಲ.
-
ನಿಮ್ಮ ಕಥೆಯ ಯಾವುದೇ ಭಾಗದಲ್ಲೂ ಲೈಂಗಿಕ ಕ್ರಿಯೆಗಳನ್ನು ಅತಿಯಾಗಿ ಅಥವಾ ನೇರವಾಗಿ ಎಳೆಎಳೆಯಾಗಿ ವರ್ಣಿಸುವುದು ಮತ್ತು ದೇಹದ ಅಂಗಾಂಗಗಳಿಗೆ ಅಶ್ಲೀಲ ಪದಗಳನ್ನು ಬಳಸುವುದು ನಿಷಿದ್ಧ.
-
ಕಥೆಯ ಮುಖಪುಟ ಚಿತ್ರಗಳಲ್ಲಿ ಬೆತ್ತಲೆ ಚಿತ್ರಣ ಅಥವಾ ಲೈಂಗಿಕವಾಗಿ ಪ್ರಚೋದಿಸುವ ಭಂಗಿಗಳನ್ನು ಯಾವುದೇ ಕಾರಣಕ್ಕೂ ಬಳಸುವಂತಿಲ್ಲ. ಕಥೆಯ ಒಳಗಿನ ವಿಷಯ ಏನೇ ಇರಲಿ, ಮುಖಪುಟ ಚಿತ್ರಗಳಿಗೆ ಈ ನಿಯಮವು ಕಡ್ಡಾಯವಾಗಿ ಮತ್ತು ಯಾವುದೇ ವಿನಾಯಿತಿ ಇಲ್ಲದೆ ಅನ್ವಯಿಸುತ್ತದೆ.
-
ಸಮ್ಮತಿ ಇಲ್ಲದ ಲೈಂಗಿಕ ಕ್ರಿಯೆ, ಲೈಂಗಿಕ ದೌರ್ಜನ್ಯ ಅಥವಾ ಅಪ್ರಾಪ್ತರು ಹಾಗೂ ಮಕ್ಕಳನ್ನು ಒಳಗೊಂಡ ಯಾವುದೇ ಲೈಂಗಿಕ ಕೃತ್ಯಗಳನ್ನು ಪ್ರೋತ್ಸಾಹಿಸುವುದು, ವೈಭವೀಕರಿಸುವುದು ಅಥವಾ ಸರಿಯೆಂದು ಬಿಂಬಿಸುವ ಬರಹಗಳನ್ನು ಅತ್ಯಂತ ಗಂಭೀರ ಅಪರಾಧ ಹಾಗೂ ನಮ್ಮ ನೀತಿ ನಿಯಮಗಳ ಉಲ್ಲಂಘನೆ ಎಂದು ಪರಿಗಣಿಸಲಾಗುತ್ತದೆ.
-
ಮೇಲಿನ ಯಾವುದೇ ನಿಯಮಗಳನ್ನು ಉಲ್ಲಂಘಿಸಿದಲ್ಲಿ ಕೃತಿಯನ್ನು ತೆಗೆದುಹಾಕಲಾಗುತ್ತದೆ, ಓದುಗರಿಗೆ ಕಾಣಿಸದಂತೆ ನಿರ್ಬಂಧಿಸಲಾಗುತ್ತದೆ ಹಾಗೂ ನಿಯಮಗಳನ್ನು ಪದೇ ಪದೇ ಮುರಿದಲ್ಲಿ ಅಂತಹ ಖಾತೆಯ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು.
ಕೃತಿಚೌರ್ಯದ ಕುರಿತ ಮಾರ್ಗಸೂಚಿಗಳು :
-
ನೀವು ಸ್ವತಃ ರಚಿಸಿದ ನೈಜ ಕೃತಿಗಳನ್ನು ಮಾತ್ರ ಪ್ರಕಟಿಸಿ.
-
ಪುಸ್ತಕಗಳು, ಚಲನಚಿತ್ರಗಳು, ಕಿರುತೆರೆ ಧಾರಾವಾಹಿಗಳು, ಬ್ಲಾಗ್ಗಳು ಅಥವಾ ಪ್ರಕಟಿತವಾಗಿರುವ ಯಾವುದೇ ಇತರ ಮೂಲಗಳಿಂದ ಪೂರ್ಣವಾಗಿ ಅಥವಾ ಭಾಗಶಃ ವಿಷಯವನ್ನು ನಕಲಿಸಿ, ಕೆಲವು ಪದಗಳನ್ನು ಬದಲಾಯಿಸಿ ನಿಮ್ಮದೇ ಕೃತಿ ಎಂಬಂತೆ ಪ್ರಕಟಿಸಲು ಅನುಮತಿಯಿಲ್ಲ.
-
ಇತರರ ಕೃತಿಯನ್ನು ದೃಶ್ಯದಿಂದ ದೃಶ್ಯಕ್ಕೆ ಮರುಬರಹ ಮಾಡುವುದು ಅಥವಾ ಮೇಲ್ನೋಟದ ವಿವರಗಳನ್ನು ಬದಲಾಯಿಸಿ ಅವರ ಕಥಾವಸ್ತು, ಪಾತ್ರಗಳು ಹಾಗೂ ಕಥೆಯ ಚೌಕಟ್ಟನ್ನು ಮರುಬಳಕೆ ಮಾಡುವುದನ್ನು ಕೂಡ ಕೃತಿಚೌರ್ಯ ಎಂದೇ ಪರಿಗಣಿಸಲಾಗುತ್ತದೆ.
-
ಇನ್ನೊಬ್ಬ ಲೇಖಕರ ಕೃತಿಯನ್ನು ಬೇರೆ ಭಾಷೆಗೆ ಅನುವಾದಿಸಲು ಅಥವಾ ಅಳವಡಿಸಿಕೊಳ್ಳಲು ಅವರ ಲಿಖಿತ ಪೂರ್ವಾನುಮತಿ ಕಡ್ಡಾಯ. ಮೂಲ ಲೇಖಕರಿಗೆ ಗೌರವಪೂರ್ವಕ ಉಲ್ಲೇಖ ನೀಡಿದ್ದರೂ ಸಹ, ಅನುಮತಿ ಇಲ್ಲದೇ ಅನುವಾದವನ್ನು ಪ್ರಕಟಿಸುವುದು ನಿಯಮಗಳ ಉಲ್ಲಂಘನೆಯಾಗುತ್ತದೆ.
-
ಮೂಲ ಲೇಖಕರ ಹೆಸರನ್ನು ಉಲ್ಲೇಖಿಸುವುದು ಅನುಮತಿಗೆ ಪರ್ಯಾಯವಾಗುವುದಿಲ್ಲ. ಮೂಲ ಲೇಖಕರ ಹೆಸರು ಹಾಕಿದರೂ ಸಹ ಇತರರ ಕೃತಿಯನ್ನು ಹಂಚಿಕೊಳ್ಳಲು ಅವರ ಸ್ಪಷ್ಟ ಒಪ್ಪಿಗೆ ಅಗತ್ಯ.
-
ಪ್ರಕಟವಾಗುವ ಪ್ರತಿಯೊಂದು ಕೃತಿಯನ್ನು ಹೋಲಿಕೆಗಾಗಿ ಪ್ರತಿಲಿಪಿಯ ಬೃಹತ್ ಸಂಗ್ರಹದೊಂದಿಗೆ ತಂತ್ರಜ್ಞಾನದ ಮೂಲಕ ಪರಿಶೀಲಿಸಲಾಗುತ್ತದೆ. ಮೂಲ ಲೇಖಕರಿಂದ ಅಧಿಕೃತ ದೂರು ಬರದಿದ್ದರೂ ಸಹ, ಹೋಲಿಕೆ ಕಂಡುಬಂದಲ್ಲಿ ಅಂತಹ ಕೃತಿಗಳನ್ನು ಪರಿಶೀಲಿಸಿ ತೆಗೆದುಹಾಕಬಹುದು.
-
ನಿಯಮ ಉಲ್ಲಂಘಿಸಿದಲ್ಲಿ ಕೃತಿಯನ್ನು ಅಪ್ರಕಟಿತಗೊಳಿಸಲಾಗುವುದು ಅಥವಾ ಶಾಶ್ವತವಾಗಿ ಅಳಿಸಿಹಾಕಲಾಗುತ್ತದೆ ಹಾಗೂ ಪುನರಾವರ್ತಿತ ಉಲ್ಲಂಘನೆಗಳ ಸಂದರ್ಭದಲ್ಲಿ ಪ್ರೊಫೈಲ್ ಅಮಾನತುಗೊಳಿಸುವ ಕ್ರಮ ಕೈಗೊಳ್ಳಲಾಗುತ್ತದೆ. ಅಧಿಕೃತ ಹಕ್ಕುಸ್ವಾಮ್ಯ ದೂರುಗಳು ಬಂದಲ್ಲಿ ಕೃತಿಚೌರ್ಯ ಮಾಡಿದ ಲೇಖಕರ ವಿರುದ್ಧ ಕಾನೂನು ಕ್ರಮವನ್ನೂ ಕೈಗೊಳ್ಳಬೇಕಾಗಬಹುದು.
ದ್ವೇಷಪೂರಿತ ವಿಷಯಗಳ ಕುರಿತ ಮಾರ್ಗಸೂಚಿಗಳು :
-
ಓದುಗರು, ಸಹ ಲೇಖಕರು ಅಥವಾ ಸಾರ್ವಜನಿಕ ವ್ಯಕ್ತಿಗಳು ಸೇರಿದಂತೆ ಯಾವುದೇ ನಿರ್ದಿಷ್ಟ ವ್ಯಕ್ತಿ ಅಥವಾ ಸಮುದಾಯವನ್ನು ಗುರಿಯಾಗಿಸಿ ಅವಮಾನಿಸಲು, ನಿಂದಿಸಲು, ಬೆದರಿಕೆ ಹಾಕಲು ಅಥವಾ ಕಿರುಕುಳ ನೀಡಲು ನಿಮ್ಮ ಕಥೆಗಳು, ವಿಮರ್ಶೆಗಳು, ಸಂದೇಶಗಳು ಅಥವಾ ಪ್ರೊಫೈಲ್ ವಿವರಗಳನ್ನು ಬಳಸಬೇಡಿ.
-
ಅರ್ಥಪೂರ್ಣ ಕಥೆಯ ಭಾಗವಾಗಿ ಜಾತಿ ತಾರತಮ್ಯ, ಕೋಮು ಉದ್ವಿಗ್ನತೆ, ಕೌಟುಂಬಿಕ ದೌರ್ಜನ್ಯ ಅಥವಾ ಬಾಲ್ಯವಿವಾಹದಂತಹ ಸಮಾಜದ ಕಠಿಣ ವಾಸ್ತವಗಳನ್ನು ಕಾಲ್ಪನಿಕ ಕಥೆಗಳಲ್ಲಿ ಮುಕ್ತವಾಗಿ ವಿವರಿಸಬಹುದು. ಇಂತಹ ಹಾನಿಕಾರಕ ಆಚರಣೆಗಳನ್ನು ಬಯಲು ಮಾಡಲು ಅಥವಾ ಪ್ರಶ್ನಿಸಲು ಬರೆಯುವುದು ಮತ್ತು ಅವುಗಳನ್ನು ಪ್ರೋತ್ಸಾಹಿಸುವುದು ಎರಡೂ ಬೇರೆ ಬೇರೆ ಪ್ರಕ್ರಿಯೆಗಳು.
-
ಯಾವುದೇ ವ್ಯಕ್ತಿ, ಸಮುದಾಯ, ಧರ್ಮ, ಜಾತಿ, ಲಿಂಗಗಳ ವಿರುದ್ಧ ಹಿಂಸೆ, ದ್ವೇಷ, ದೌರ್ಜನ್ಯ ಅಥವಾ ತಾರತಮ್ಯವನ್ನು ಸಹಜವೆಂದು ಬಿಂಬಿಸುವುದು, ವೈಭವೀಕರಿಸುವುದು ಅಥವಾ ಸರಿಯೆಂದು ಪ್ರಸ್ತುತಪಡಿಸುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ.
-
ನಿಮ್ಮ ಪ್ರೊಫೈಲ್ ಹೆಸರು, ಚಿತ್ರ ಅಥವಾ ಪರಿಚಯ ವಿವರಗಳು ಸೇರಿದಂತೆ ಎಲ್ಲಿಯೂ ಯಾವುದೇ ವರ್ಗದ ವಿರುದ್ಧ ದ್ವೇಷ ಅಥವಾ ಹಿಂಸೆಯನ್ನು ಪ್ರಚೋದಿಸುವ ನಿಂದನೀಯ ಪದಗಳು, ರಾಜಕೀಯವಾಗಿ ಪ್ರಚೋದನಕಾರಿ ವಿಷಯಗಳು, ದ್ವೇಷಪೂರಿತ ಚಿಹ್ನೆಗಳು ಅಥವಾ ಭಾಷೆಯನ್ನು ಬಳಸಬೇಡಿ.
-
ಕಾಲ್ಪನಿಕವಲ್ಲದ ಬರಹಗಳಲ್ಲಿ ಆಧಾರರಹಿತ ವದಂತಿಗಳನ್ನು ಹರಡುವುದು, ಐತಿಹಾಸಿಕ ಸತ್ಯಗಳನ್ನು ತಿರುಚುವುದು ಅಥವಾ ಒಂದು ಸಮುದಾಯವು ಇನ್ನೊಂದಕ್ಕಿಂತ ಶ್ರೇಷ್ಠ ಅಥವಾ ಕೀಳು ಎಂದು ಬಿಂಬಿಸುವುದನ್ನು ಪ್ರಕಟಿಸಬಾರದು.
-
ಅಪ್ರಾಪ್ತರನ್ನು ಲೈಂಗಿಕವಾಗಿ ಬಳಸಿಕೊಳ್ಳುವುದು, ಬಾಲ್ಯವಿವಾಹವನ್ನು ಅಪೇಕ್ಷಣೀಯವೆಂದು ಪ್ರಚಾರ ಮಾಡುವುದು ಅಥವಾ ಮಹಿಳೆಯರ ಮೇಲಿನ ಲೈಂಗಿಕ ಹಾಗೂ ದೈಹಿಕ ದೌರ್ಜನ್ಯವನ್ನು ವೈಭವೀಕರಿಸುವುದನ್ನು ಅತ್ಯಂತ ಗಂಭೀರ ಹಾಗೂ ಕಿಂಚಿತ್ತೂ ಸಹಿಸದ ನೀತಿ ಉಲ್ಲಂಘನೆ ಎಂದು ಪರಿಗಣಿಸಲಾಗುತ್ತದೆ.
-
ಉಲ್ಲಂಘನೆಯ ತೀವ್ರತೆಗೆ ಅನುಗುಣವಾಗಿ ಎಚ್ಚರಿಕೆ ನೀಡುವುದು, ಕೃತಿಯನ್ನು ತೆಗೆದುಹಾಕುವುದು ಮತ್ತು ಪ್ರೊಫೈಲ್ ಅನ್ನು ಶಾಶ್ವತವಾಗಿ ನಿರ್ಬಂಧಿಸುವ ಕ್ರಮ ಕೈಗೊಳ್ಳಲಾಗುತ್ತದೆ. ಕಾನೂನುಬಾಹಿರ ವಿಷಯಗಳಿದ್ದಲ್ಲಿ ಯಾವುದೇ ಮುನ್ಸೂಚನೆ ಇಲ್ಲದೆ ಪ್ರೊಫೈಲ್ ಅನ್ನು ನಿರ್ಬಂಧಿಸಲಾಗುವುದು ಹಾಗೂ ಸಂಬಂಧಪಟ್ಟ ಕಾನೂನು ಪ್ರಾಧಿಕಾರಗಳಿಗೆ ವರದಿ ಮಾಡಲಾಗುವುದು.