ವಿಭಿನ್ನ ಪ್ರೀತಿಯ ಕತೆ’ಗಳನ್ನು ರಚಿಸಲು ಹಲವು ಕಥಾಹಂದರಗಳು

 

ಪ್ರೇಮ ಕತೆಗಳು ಯಾರಿಗೆ ತಾನೇ ಇಷ್ಟವಾಗುವುದಿಲ್ಲ? ಸಾಮಾನ್ಯವಾಗಿ ಪ್ರೇಮಕತೆಗಳು ಎಲ್ಲಾ ವಯೋಮಾನದ ಓದುಗರಿಗೂ ಮನರಂಜನೆ ನೀಡುತ್ತವೆ. ಪ್ರಮುಖವಾಗಿ ಪ್ರತಿಲಿಪಿಯ ಓದುಗರು ಈ ಕೆಳಗಿನ ವಿಷಯಾಧಾರಿತ ಪ್ರೇಮಕತೆಗಳನ್ನು ಹೆಚ್ಚು ಇಷ್ಟಪಡುತ್ತಾರೆ-

1. ವ್ಯಾಂಪೈರ್ ಜೊತೆಗಿನ ಪ್ರೇಮ ಕಥೆ

2. ಬಾಸ್/ಸಿ.ಇ.ಓ. ಜೊತೆಗಿನ ಪ್ರೇಮ ಕಥೆ

3. ಒಪ್ಪಂದದ(ಕಾಂಟ್ರಾಕ್ಟ್) ಮದುವೆ ಅಥವಾ ಒಪ್ಪಂದದ ಪ್ರೇಮ ಕಥೆ

 

ಅಂದರೆ ಈ ಮೇಲಿನ ವಿಷಯಗಳ ಆಧಾರದ ಮೇಲೆ ಕತೆಗಳನ್ನು ರಚಿಸಿ ಬರಹಗಾರರು ಪ್ರತಿಲಿಪಿಯಲ್ಲಿ ಹೆಚ್ಚು ಓದುಗರನ್ನು ಹಾಗೂ ಜನಪ್ರಿಯತೆಯನ್ನು ಗಳಿಸಬಹುದು. ನಾವು ಈ ಕುರಿತು ಹೆಚ್ಚಿನ ಮಾಹಿತಿ ಮತ್ತು ಕೆಲವು ಕಥಾ ಹಂದರಗಳನ್ನು ನಿಮಗೆ ನೀಡಲು ಬಯಸುತ್ತೇವೆ. ನೀವು ನಿಮ್ಮಿಷ್ಟದ ಯಾವುದೇ ಕಥಾಹಂದರವನ್ನು ಆಯ್ದುಕೊಂಡು ಅಥವಾ ಮೇಲಿನ ವಿಷಯಗಳ ಆಧಾರದ ಮೇಲೆ ನಿಮ್ಮದೇ ಕಥಾಹಂದರವನ್ನು ಆಲೋಚಿಸಿ ಕತೆಯನ್ನು ಬರೆಯಬಹುದು.

 

ಕಥಾಹಂದರಗಳು- ವ್ಯಾಂಪೈರ್ ಜೊತೆಗಿನ ಪ್ರೇಮ ಕಥೆ 

1. ಒಂದು ಹುಡುಗ ಮತ್ತು ಹುಡುಗಿ ಪ್ರೀತಿಸುತ್ತಿರುತ್ತಾರೆ. ಇಬ್ಬರೂ ತದ್ವಿರುದ್ಧ, ಅಂದರೆ ಹುಡುಗಿ ಅಂತರ್ಮುಖಿಯಾದರೆ ಹುಡುಗ ಬಹಿರ್ಮುಖಿ ವ್ಯಕ್ತಿತ್ವದವ. ಹುಡುಗಿ ಹೆಚ್ಚು ಸ್ನೇಹಿತರನ್ನು ಹೊಂದಿರುವುದಿಲ್ಲ. ಒಂದು ಬಾರಿ ಆ ಹುಡುಗಿಯ ಜೊತೆ ಸಮಯ ಕಳೆಯುವಾಗ ಅವಳ ಹಲ್ಲು ನೋಡಿ ಹುಡುಗನಿಗೆ ಅವಳು ವ್ಯಾಂಪೈರ್ ಎಂದು ತಿಳಿಯುತ್ತದೆ! ಮುಂದೆ ಏನಾಗಬಹುದು? ಅವರಿಬ್ಬರ ಪ್ರೀತಿಯ ಕತೆ ಏನಾಗುತ್ತದೆ?

 

2. ಸಾಗರ್ ಮತ್ತು ಪ್ರಜ್ಞಾ ಹಲವು ತಿಂಗಳುಗಳಿಂದ ಪ್ರೀತಿಸುತ್ತಿರುತ್ತಾರೆ. ಒಂದು ದಿನ ಸಾಗರ್ ಮನುಷ್ಯನಲ್ಲ, ವ್ಯಾಂಪೈರ್ ಎಂದು ಪ್ರಜ್ಞಾಳಿಗೆ ತಿಳಿಯುತ್ತದೆ. ಸುಳ್ಳು ಹೇಳಿದ್ದಕ್ಕಾಗಿ ಅವಳು ಕೋಪಗೊಂಡು ಅವನಿಂದ ದೂರವಾಗುತ್ತಾಳೆ. ಆದರೆ ಸಾಗರ್ ತನ್ನ ಪ್ರೀತಿಯನ್ನು ಮರೆಯುವುದಿಲ್ಲ ಮತ್ತು ಅವಳ ರಕ್ಷಕನಾಗಿ ಸದಾ ಅವಳ ಜೊತೆ ಇರುತ್ತಾನೆ. ಅವಳಿಗೆ ಎದುರಾಗುವ ಎಲ್ಲ ಕಷ್ಟಗಳನ್ನು ಅವನು ಪರಿಹರಿಸುತ್ತಾನೆ.

 

3. ಇಶಾನ್ ವ್ಯಾಂಪೈರ್ ಲೋಕದ ಸುಂದರ ತರುಣ. ಅವನು ನಯನಿಕಾ ಎನ್ನುವ ಸುಂದರಿಯನ್ನು ಪ್ರೀತಿಸತೊಡಗುತ್ತಾನೆ. ಅವಳನ್ನು ಪಡೆದುಕೊಳ್ಳಲು ಜಾಲ ಹೆಣೆಯುತ್ತಾನೆ. ನಯನಿಕಾಳ ಕ್ಲಾಸ್ ಮೇಟ್ ಸೌರವ್ ಕೂಡ ಅವಳನ್ನು ಗುಟ್ಟಾಗಿ ಪ್ರೀತಿಸುತ್ತಿರುತ್ತಾನೆ. ನಯನಿಕಾಳಿಗೆ ಏನೋ ಅಪಾಯವಿರುವುದೆಂದು ಸೌರವ್'ನಿಗೆ ಭಾಸವಾಗುತ್ತಿರುತ್ತದೆ. ಸೌರವ್ ವ್ಯಾಂಪೈರ್ ಜಾಲದಿಂದ ನಯನಿಕಾಳನ್ನು ರಕ್ಷಿಸುವಲ್ಲಿ ಸಫಲನಾಗುತ್ತಾನಾ? ತ್ರಿಕೋನ ಪ್ರೇಮಕಥೆ ಮುಂದೆ ಏನಾಗಬಹುದು?

 

4. ಅದು 2070 ನೇ ಇಸವಿ, ಪ್ರಪಂಚ ಹಲವು ಬದಲಾವಣೆಗಳನ್ನು ಕಂಡಿರುತ್ತದೆ. ಮಾನವರ ಸಾಮ್ರಾಜ್ಯದಲ್ಲಿ ಯಂತ್ರಗಳದ್ದೇ ಕಾರುಬಾರು. ಮೀರಾ ಒಬ್ಬ ಹೋರಾಟಗಾರ್ತಿ, ಮಾನವ ಜೀವನದಲ್ಲಿ ಯಂತ್ರಗಳ ಹಸ್ತಕ್ಷೇಪದ ಕುರಿತು ಹೋರಾಟ ಮಾಡುತ್ತಿರುತ್ತಾಳೆ. ಅವಳು ಸುಜಯ್ ಎನ್ನುವ ಹುಡುಗನನ್ನು ಭೇಟಿ ಮಾಡುತ್ತಾಳೆ, ಕಾಲಕ್ರಮೇಣ ಪ್ರೀತಿಸತೊಡಗುತ್ತಾಳೆ. ಆದರೆ ಅವನು ತನ್ನ ಬಳಗವನ್ನು ರಕ್ಷಿಸುವ ಕಾಯಕದಲ್ಲಿರುವುದು ತಿಳಿದುಬರುತ್ತದೆ. ಅವನು ವ್ಯಾಂಪೈರ್ ಲೋಕದವ! ಮೀರಾ ಮೊದಲು ವ್ಯಾಂಪೈರ್'ಗಳು ಬದುಕಿರುವುದನ್ನು ನಂಬುವುದಿಲ್ಲ. ಮೀರಾ ವ್ಯಾಂಪೈರ್ ಜೊತೆಗಿನ ತನ್ನ ಪ್ರೀತಿಯನ್ನು ಉಳಿಸಿಕೊಳ್ಳುತ್ತಾಳಾ? ವಾಂಪೈರ್'ಗಳನ್ನು ರಕ್ಷಿಸುವ ಕಾಯಕದಲ್ಲಿ ಅವನಿಗೆ ನೆರವಾಗುತ್ತಾಳಾ?

 

5. ಸೀಮಾ ಹತ್ತನೇ ತರಗತಿಯಲ್ಲಿ ಓದುತ್ತಿರುತ್ತಾಳೆ. ಅವಳ ಗೆಳತಿಯರು ಅವಳಿಗೆ ಬಹಳ ತೊಂದರೆಗಳನ್ನು ನೀಡುತ್ತಿರುತ್ತಾರೆ. ಒಂದು ದಿನ ಅವಳು ಅವಳ ಕ್ಲಾಸ್ ಮೇಟ್ ಅನಂತನನ್ನು ನೋಡುತ್ತಾಳೆ. ಅವನು ಎಲ್ಲರಿಗಿಂತ ಭಿನ್ನವಾಗಿರುತ್ತಾನೆ. ಅವರಿಬ್ಬರೂ ಉತ್ತಮ ಗೆಳೆಯರಾಗುತ್ತಾರೆ. ಅನಂತ ಪ್ರತಿದಿನ ಊಟದ ಸಮಯದಲ್ಲಿ ಶಾಲೆಯ ಹಿಂದಿನ ಒಂದು ರಹಸ್ಯ ಮನೆಗೆ ಹೋಗಿಬರುತ್ತಾನೆ, ಅಲ್ಲಿ ಯಾರಿಗೂ ಪ್ರವೇಶವಿರುವುದಿಲ್ಲ! ಒಂದು ದಿನ ಸೀಮಾ ಅವನನ್ನು ಹಿಂಬಾಲಿಸಿದಾಗ ಒಂದು ಒಡಕು ಕನ್ನಡಿಯಲ್ಲಿ ಅವನ ಪ್ರತಿರೂಪ ಬದಲಾಗುವುದನ್ನು ಕಾಣುತ್ತಾಳೆ. ಅವನ ಮುಖದಿಂದ ನೆತ್ತರು ಹರಿಯುತ್ತಿರುತ್ತದೆ ಮತ್ತು ಕೋರೆ ಹಲ್ಲುಗಳನ್ನು ಹೊಂದಿರುತ್ತಾನೆ. ಅನಂತ ಯಾರಾಗಿರಬಹುದು? ಸೀಮಾ ಮುಂದೇನು ಮಾಡಬಹುದು?

 

ಕಥಾಹಂದರಗಳು - ಬಾಸ್/ಸಿ.ಇ.ಓ. ಜೊತೆಗಿನ ಪ್ರೇಮ ಕಥೆ

 

1. ಸುಹಾಸಿನಿ ಒಬ್ಬ ಮಧ್ಯಮ ವರ್ಗದ ಹೆಣ್ಣು, ಶ್ರಮ ಜೀವಿ. ಅವಳು ಒಂದು ಎಂ.ಎನ್.ಸಿ ಕಂಪನಿಯಲ್ಲಿ ಸಿ.ಇ.ಓ. ಗೆ ಸೆಕ್ರೆಟರಿ ಆಗಿ ಕೆಲಸ ಮಾಡುತ್ತಿರುತ್ತಾಳೆ. ಸಿ.ಇ.ಓ ತನ್ನನ್ನು ಪ್ರೀತಿಸುತ್ತಿರುವುದು ಅವಳಿಗೆ ತಿಳಿದಿರುವುದಿಲ್ಲ. ಒಂದು ದಿನ ಆಫೀಸ್ ಪಾರ್ಟಿಯಲ್ಲಿ ಮ್ಯಾನೇಜರ್ ಒಬ್ಬರಿಂದ ಅವಮಾನವಾಗುವಾಗ ಸಿ.ಇ.ಓ. ಬಂದು ಅವಳನ್ನು ಕಾಪಾಡುತ್ತಾನೆ. ಅವಳು ಅವನ ಪ್ರೀತಿಯನ್ನು ಒಪ್ಪಿಕೊಳ್ಳಬಹುದೇ? ಆಫೀಸಿನಲ್ಲಾಗುವ ಹಗರಣದಿಂದ ಅವಳು ಹೊರಬರುವಳೇ? ವಿಧಿ ಅವರಿಬ್ಬರನ್ನು ಒಂದು ಮಾಡುವುದೇ?

 

2. ಪೂಜಾಳ ಬಾಸ್, ಸಾಹಿಲ್ ಒಬ್ಬ ಅಹಂಕಾರಿ ಮತ್ತು ಒರಟ. ಅವನು ತನ್ನ ಸುತ್ತಲಿನ ಜನರಿಗೆ ಯಾವುದೇ ಮನ್ನಣೆ, ಗೌರವ ನೀಡುತ್ತಿರಲಿಲ್ಲ. ಪೂಜಾ ಅವನಿಗೆ ತದ್ವಿರುದ್ಧ ಸ್ವಭಾವದವಳು, ಬಹಳ ಶಾಂತ ಹಾಗೂ ಎಲ್ಲರನ್ನೂ ಪ್ರೀತಿಸುವವಳು. ಎರಡು ವಿರುದ್ಧ ಧ್ರುವಗಳಂತಿರುವ ಅವರ ನಡುವೆ ಪ್ರೀತಿ ಉಂಟಾದರೆ ಏನಾಗಬಹುದು? ಅವರ ಪ್ರೀತಿ ಉಳಿಯಬಹುದೇ, ಅಥವಾ ಘರ್ಷಣೆಗೊಳಪಟ್ಟು ಬೇರಾಗಬಹುದೇ?

 

3. ಅನನ್ಯಾ ಮುಂಬೈಗೆ ತನ್ನ ನೌಕರಿಯ ಕಾರಣಕ್ಕಾಗಿ ಹೋಗುತ್ತಿರುತ್ತಾಳೆ. ರೈಲಿನಲ್ಲಿ ಅವಳು ಒಬ್ಬ ತರುಣನನ್ನು ಭೇಟಿ ಮಾಡುತ್ತಾಳೆ. ಇಬ್ಬರೂ ಉತ್ತಮ ಸ್ನೇಹಿತರಾಗುತ್ತಾರೆ. ಆ ಪ್ರಯಾಣದ ಅನಂತರ ಅವರಿಬ್ಬರೂ ಆ ನೆನಪುಗಳಲ್ಲೇ ಖುಷಿಯಾಗಿರುತ್ತಾರೆ. ಆಫೀಸಿನಲ್ಲಿ ಮೊದಲ ದಿನ ಅವಳು, ಅವನೇ ತನ್ನ ಬಾಸ್ ಎಂದು ತಿಳಿದು ಅಚ್ಚರಿ ಪಡುತ್ತಾಳೆ. ವಿಧಿ ಅವರಿಬ್ಬರನ್ನು ಒಂದು ಮಾಡಲೆಂದೇ ಪದೇ ಪದೇ ಭೇಟಿ ಮಾಡಿಸುತ್ತಿರಬಹುದೇ? ಅವರಿಬ್ಬರೂ ಒಬ್ಬರನ್ನೊಬ್ಬರು ಪ್ರೀತಿಸಬಹುದೇ?

 

4. ಹರ್ಷ ಮತ್ತು ಶ್ರುತಿ ಮಧ್ಯಮ ವರ್ಗದವರು, ಒಬ್ಬರನ್ನೊಬ್ಬರು ಪ್ರೀತಿಸುತ್ತಿರುತ್ತಾರೆ. ಇಬ್ಬರೂ ಕಾರ್ಪೋರೇಟ್ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿರುತ್ತಾರೆ. ಅವರಿಬ್ಬರ ಪ್ರೀತಿಯ ಕತೆ ಅಲ್ಲಿ ಯಾರಿಗೂ ತಿಳಿದಿರುವುದಿಲ್ಲ. ಒಂದು ದಿನ ಸಹೋದ್ಯೋಗಿಗಳ ಮಾತಿನಿಂದ ಹರ್ಷನಿಗೆ, ಕಂಪನಿಯ ಬಾಸ್ ಶ್ರುತಿಯನ್ನು ಪ್ರೀತಿಸುತ್ತಿರುವುದು ತಿಳಿಯುತ್ತದೆ. ಆಗ ಅವನಿಗೆ ಒಂದು ಯೋಜನೆ ಹೊಳೆಯುತ್ತದೆ. ಅದರಂತೆ ಅವರು ಶ್ರೀಮಂತರಾಗಲು ಬಾಸ್'ನನ್ನು ಯಾಮಾರಿಸುವ ಜಾಲ ಹೆಣೆಯುತ್ತಾರೆ. ಕತೆ ಮುಂದೆ ಹೇಗೆ ತಿರುವುಗಳನ್ನು ಪಡೆಯಬಹುದು?

 

5. ಅದ್ವಿಕ್ ಒಬ್ಬ ಸುಂದರ ಹಾಗೂ ಬುದ್ಧಿವಂತ ಯುವಕ. ಅವನು ಒಂದು ಕಂಪನಿಯ ಸಿ.ಇ.ಓ ಆಗಿರುತ್ತಾನೆ. ಹಲವಾರು ಹುಡುಗಿಯರರು ಅವನ ಹಿಂದೆ ಸುತ್ತುತ್ತಿರುತ್ತಾರೆ. ಹುಡುಗಿಯರು ಅವನ ಪಾಲಿಗೆ ಆಟದ ಗೊಂಬೆಗಳಂತೆ! ಅನು ಒಬ್ಬಳು ಚೆಂದದ ಹುಡುಗಿ, ಆದರೆ ಅನಾಥೆ. ಅವಳು ಅದ್ವಿಕ್ ಆಫೀಸಿನಲ್ಲಿ ಕೆಲಸ ಮಾಡಲು ಆರಂಭಿಸಿ ಹತ್ತು ದಿನಗಳಾಗಿರುತ್ತದೆ. ಅವಳಿನ್ನೂ ಅದ್ವಿಕ್ ಕಣ್ಣಿಗೆ ಬಿದ್ದಿರುವುದಿಲ್ಲ. ಒಮ್ಮೆ ಅನು ಅದ್ವಿಕ್ ಕಣ್ಣಿಗೆ ಕಾಣಿಸಿಕೊಂಡರೆ ಏನಾಗಬಹುದು? ಅವಳೂ ಅವನ ಪಾಲಿನ ಆಟದ ಗೊಂಬೆಯಾಗಬಹುದೇ? ಅಥವಾ ಅವಳು ಅವನನ್ನು ಬದಲಾಯಿಸಿ ಇಬ್ಬರೂ ಪ್ರೇಮಿಗಳಾಗಬಹುದೇ?

 

ಕಥಾಹಂದರಗಳು- ಒಪ್ಪಂದದ(ಕಾಂಟ್ರಾಕ್ಟ್) ಮದುವೆ ಅಥವಾ ಒಪ್ಪಂದದ ಪ್ರೇಮ ಕಥೆ

 

1. ಹತ್ತು ವರ್ಷಗಳಿಂದ ಪ್ರೀತಿಸುತ್ತಿದ್ದ ಒಂದು ಹೆಣ್ಣಿನಿಂದ ಸುಜಯ್'ಗೆ ದ್ರೋಹವಾಗಿರುತ್ತದೆ. ಹಾಗಾಗಿ ಅವನು ಹೆಣ್ಣನ್ನು ದ್ವೇಷಿಸತೊಡಗುತ್ತಾನೆ. ಆದರೆ ಶ್ರೀಮಂತ ಕುಟುಂಬದ ಒಬ್ಬನೇ ಮಗನಾದ ಅವನಿಗೆ ಮದುವೆಯಾಗುವಂತೆ ಮನೆಯವರು ಒತ್ತಾಯಿಸುತ್ತಿರುತ್ತಾರೆ. ಪೂಜಾ ಎನ್ನುವ ಅವನ ಕಂಪನಿಯ ಉದ್ಯೋಗಿಯ ಜೊತೆ ಕಾಂಟ್ರಾಕ್ಟ್ ಮದುವೆ ಆಗುತ್ತಾನೆ. ಕಾಂಟ್ರಾಕ್ಟ್ ಪ್ರಕಾರ ಪೂಜಾ ಅವನಿಗೆ ಮಗುವೊಂದನ್ನು ಹೆತ್ತು ಕೊಟ್ಟ ಅನಂತರ ಬೇರೆಯಾಗಬೇಕು. ಮುಂದೆ ಪೂಜಾ ತನ್ನ ಮಗುವಿನ ಜೊತೆ ಬದುಕುವ ಅವಕಾಶ ಪಡೆಯಬಹುದೇ? ಕಾಂಟ್ರಾಕ್ಟ್ ಮದುವೆ ಪ್ರೀತಿಯಾಗಿ ಪರಿವರ್ತನೆಯಾಗಬಹುದೇ? ಸುಜಯ್ ಬದಲಾಗಬಹುದೇ?

 

2. ಪಾರ್ಥನಿಗೆ ತನ್ನ ಹಿಂದಿನ ಪ್ರಿಯತಮೆಯ ಜೊತೆ ಬ್ರೇಕ್ ಅಪ್ ಆಗಿರುತ್ತದೆ. ಆದರೆ ಎಂದಿನಂತೆ ಅವಳು ವಾಪಸ್ಸು ಬರುತ್ತಾಳೆ ಎಂದು ಪಾರ್ಥ ಕಾಯುತ್ತಿರುತ್ತಾನೆ. ಆದರೆ ಬಹಳ ದಿನಗಳುರುಳುತ್ತವೆ. ಅವಳಿಗೆ ಅಸೂಯೆ ಉಂಟುಮಾಡಲು ಪಾರ್ಥ, ತನ್ನ ಸೆಕ್ರೆಟರಿ ನಿಯತಿ ಜೊತೆ ಮದುವೆಯಾಗುವುದಾಗಿ ಘೋಷಿಸುತ್ತಾನೆ. ಒಂದು ವರ್ಷದ ಕಾಂಟ್ರಾಕ್ಟ್ ಮದುವೆಯ ಅನಂತರ ಡಿವೋರ್ಸ್ ಕೊಡುವುದಾಗಿ ಹೇಳಿ ನಿಯತಿಯನ್ನು ಒಪ್ಪಿಸುತ್ತಾನೆ. ನಿಯತಿಗೆ ತನ್ನ ಮನೆಯಲ್ಲಿ ಮದುವೆಯಾಗಲು ಒತ್ತಾಯಿಸುತ್ತಿರುವುದರಿಂದ ಒಪ್ಪುತ್ತಾಳೆ. ನಿಯತಿ ಮತ್ತು ಪಾರ್ಥ ಒಬ್ಬರನ್ನೊಬ್ಬರು ಪ್ರೀತಿಸತೊಡಗಬಹುದೇ? ಪಾರ್ಥನ ಗೆಳತಿ ವಾಪಸ್ಸಾಗಬಹುದೇ? ಪ್ರೀತಿಯ ಆಟದಲ್ಲಿ ಯಾರು ಗೆಲ್ಲಬಹುದು?

 

3. ಸುನಯನಾ ಆಗರ್ಭ ಸಿರಿವಂತ ಮನೆತನದವಳು ಮತ್ತು ತನ್ನದೇ ಕಂಪನಿಯ ಸಿ.ಇ.ಓ. ಪ್ರತಿವರ್ಷ ಅವಳು ಒಬ್ಬ ಹುಡುಗನ ಜೊತೆ ಕಾಂಟ್ರಾಕ್ಟ್ ಮದುವೆ ಮಾಡಿಕೊಂಡು ತನ್ನಿಚ್ಛೆ ಪೂರೈಸಿಕೊಂಡು ಅವನನ್ನು ಬಿಟ್ಟುಬಿಡುತ್ತಿರುತ್ತಾಳೆ. ಅಜೇಯ್ ಅವಳ ಕಂಪನಿಯನ್ನು ಸೇರುತ್ತಾನೆ. ಸುನಯನಾಳನ್ನು ಪ್ರೀತಿಸತೊಡಗುತ್ತಾನೆ. ಇಬ್ಬರೂ ಹತ್ತಿರವಾಗುತ್ತಾರೆ. ಆದರೆ ಅಜೇಯ್ ತನ್ನ ಅಣ್ಣನಿಗೆ ಇವಳಿಂದ ಆದ ಮೋಸಕ್ಕೆ ಸೇಡು ತೀರಿಸಿಕೊಳ್ಳುವ ಉದ್ದೇಶದಿಂದ ಬಂದಿರುತ್ತಾನೆ…

 

4. ಪ್ರೀತಮ್ ಒಬ್ಬ ಶ್ರೀಮಂತ ಕುಟುಂಬದ ಒಬ್ಬನೇ ಮಗ. ಕಾಲೇಜಿನಲ್ಲಿ ಚಂಚಲಾಳನ್ನು ಗುಟ್ಟಾಗಿ ಪ್ರೀತಿಸುತ್ತಾನೆ. ಆದರೆ ಅವಳು ತನ್ನ ಮುಂದಿನ ವಿದ್ಯಾಭ್ಯಾಸಕ್ಕಾಗಿ ವಿದೇಶಕ್ಕೆ ಹೋಗುತ್ತಾಳೆ. ಮನೆಯವರ ಒತ್ತಾಯಕ್ಕೆ ಪ್ರೀತಮ್ ಪ್ರಿಯಾಳನ್ನು ಮದುವೆಯಾಗುತ್ತಾನೆ. ಪ್ರಿಯಾ ಒಬ್ಬಳು ಬಡ ಕುಟುಂಬದ ಹೆಣ್ಣು ಜೊತೆಗೆ ಟಿಪಿಕಲ್ ಗೃಹಿಣಿಯಾಗಿರುತ್ತಾಳೆ. ಅವರಿಬ್ಬರ ಮದುವೆ ಒಂದು ವರ್ಷದ ಕಾಂಟ್ರಾಕ್ಟ್ ಮೇಲೆ ನಿಂತಿರುತ್ತದೆ. ಅವರ ವೈವಾಹಿಕ ಜೀವನ ಹೇಗಿರಬಹುದು? ಒಂದು ವರ್ಷದ ನಂತರ ಚಂಚಲಾ ವಾಪಸ್ಸಾದರೆ ಏನಾಗಬಹುದು?

 

5. ಮದುವೆಯಾದ ಮೊದಲ ರಾತ್ರಿ ಗಂಡನಿಂದ, "ನನ್ನ ಜೊತೆ ಮಾತನಾಡಬೇಡ, ನನ್ನ ಮುಟ್ಟಬೇಡ, ನನ್ನ ವಿಷಯಕ್ಕೆ ತಲೆ ಹಾಕಬೇಡ" ಎಂಬ ಮೂರು ನಿಯಮಗಳನ್ನು ಕೇಳಿ ಸುಧಾ ಕಣ್ಣುಗಳು ಒದ್ದೆಯಾಗುತ್ತವೆ. ಆದರೆ ಅವಳು ರಜತ್'ನನ್ನು ಕಾಂಟ್ರಾಕ್ಟ್ ಮದುವೆ ಆಗಿರುತ್ತಾಳೆ. ರಜತ್ ಕೋಟ್ಯಾಧಿಪತಿ ಆದರೆ ಡಿವೋರ್ಸೀ. ಅವನ ಮಗುವಿನ ಆರೈಕೆ ಮಾಡುವುದಕ್ಕಾಗಿ ಅವರಿಬ್ಬರ ಒಪ್ಪಂದವಾಗಿರುತ್ತದೆ. ಸುಧಾಳಿಗೆ ಈ ಮದುವೆ ತನ್ನ ಸಾಲಗಳನ್ನು ತೀರಿಸುವ ಒಂದು ದಾರಿಯಾಗಿರುತ್ತದೆ. ಆದರೆ ಅವನ ನಡೆಯಿಂದ ಅವಳ ಜೀವನ ಏನಾಗಬಹುದು? ರಜತ್'ನನ್ನು ತನ್ನತ್ತ ಆಕರ್ಷಿಸಿಕೊಳ್ಳುವಲ್ಲಿ ಅವಳು ಸಫಲಳಾಬಹುದೇ?

 

ಒಂದು ಕಥಾಹಂದರದಿಂದ ಅನೇಕ ಕತೆಗಳು ಹುಟ್ಟಿಕೊಳ್ಳುತ್ತವೆ ಎಂಬ ಮಾತಿದೆ. ಈ ಮೇಲಿನ ಕೆಲವು ಕಥಾಹಂದರಗಳನ್ನು ಬಳಸಿಕೊಂಡು ನಿಮ್ಮದೇ ಕಥೆಯನ್ನು ಉತ್ತಮವಾಗಿ ಹೆಣೆಯಿರಿ. ಈ ಕೆಲವು ಕಥಾವಸ್ತುಗಳ ಜೊತೆ ನಿಮ್ಮ ಆಲೋಚನೆಗಳಿಗೆ ಸಾಣೆ ಹಿಡಿದು ಕತೆಗಳನ್ನು ಬರೆಯಿರಿ! ಅಥವಾ ಮೇಲೆ ತಿಳಿಸಿದ ಮೂರು ವಿಷಯಗಳಲ್ಲಿ ಯಾವುದೇ ವಿಷಯದ ಆಧಾರದ ಮೇಲೆ ನಿಮ್ಮದೇ ಸ್ವಂತ ಕಥಾಹಂದರವನ್ನು ಸೃಷ್ಟಿಸಿಕೊಂಡು ಕತೆಗಳನ್ನು ಹೆಣೆಯಿರಿ. 

 

ಮೊದಲೇ ಹೇಳಿದಂತೆ ಈ ವಿಷಯಗಳ ಮೇಲೆ ಕತೆಗಳನ್ನು ರಚಿಸಿ ನೀವು, ಪ್ರತಿಲಿಪಿಯಲ್ಲಿ ಹೆಚ್ಚು ಓದುಗರು, ಹಿಂಬಾಲಕರನ್ನು ಹೊಂದಬಹುದು. ನಾವು ನಿಮ್ಮ ಅದ್ಭುತ ಕಥೆಗಳಿಗಾಗಿ ಕಾಯುತ್ತಿದ್ದೇವೆ!

 

ಶುಭವಾಗಲಿ!

-ಪ್ರತಿಲಿಪಿ ಬಳಗ